عافیہ موومنٹ کے وفد کی عافیہ رہائی آن لائن پٹیشن میں تعاون کیلئے امیر جماعت اسلامی کراچی منعم ظفر خان سے ملاقات

کراچی( نمائندہ خصوصی)عافیہ موومنٹ کے ترجمان محمد ایوب اور سوشل میڈیا ٹیم کے آرگنائزر انجینئر جنید نے امیر جماعت اسلامی کراچی منعم ظفر خان سے ادارہ نورحق میں واقع ان کے دفتر میں ملاقات کی۔ اس موقع پر گفتگو کرتے ہوئے انہوں نے امیر جماعت اسلامی کراچی سے ڈاکٹر عافیہ کی رہائی کیلئے ”آن لائن پٹیشن کمپین“ میں تعاون کرنے کی درخواست کی۔محمد ایوب نے کہا کہ ڈاکٹر عافیہ کی رہائی کے سلسلے میں جاری مہم میں جماعت اسلامی نے روز اول سے انتہائی اہم کردار کیا ہے۔ انہوں نے کہا کہ سینیٹر بشریٰ انجم بٹ، سینیٹر طلحہ محمود اور ڈاکٹر اقبال آفریدی پر مشتمل ایک سرکاری وفد اس وقت امریکہ میں ہے اور وفد کے اراکین ڈاکٹر عافیہ کے وکیل کلائیو اسمتھ کے ہمراہ امریکی سینیٹرز و دیگر حکام سے ملاقاتیں کررہے ہیں۔ انجینئر جنید نے کہا کہ ہمارے یہاں آنے کا بنیادی مقصد ہدف کو مقررہ وقت میں پورا کرنے کیلئے جماعت اسلامی کے رہنماو¿ں، کارکنان اور سوشل میڈیا ٹیم کا تعاون حاصل کرنا ہے تاکہ مقررہ وقت میں مطلوبہ تعداد میں دستخط حاصل کرنے کا ہدف پورا کیا جا سکے۔ جس پر امیرجماعت اسلامی کراچی منعم ظفر خان نے آن لائن دستخط مہم میں مکمل ممکن تعاون کی یقین دہانی کرائی۔