اسلام آباد۔(نمائندہ خصوصی):وزیراعظم محمد شہباز شریف نے قوم سے باران رحمت کے لئے نماز استسقاء ادا کرنے کی اپیل کی ہے۔جمعرات کو یہاں وزیر اعظم آفس کے پریس ونگ سے جاری بیان کے مطابق وزیراعظم نے قوم سے درخواست کی ہے کہ وہ 
نماز استسقاء ادا کرے اور اللہ تعالیٰ سے باران رحمت کے لئے خصوصی دعا مانگی جائے۔وزیراعظم نے علمائے کرام اور مشائخ عظام سے کہا کہ وہ خاص طور پر نماز استسقاء کے اہتمام میں اپنا کردار ادا کریں،بارش برسنے سے ماحول میں بہتری آئے گی ، بیماریوں سے نجات ملنے میں بڑی مدد مل سکتی ہے۔وزیر اعظم نے کہا کہ اللہ تعالیٰ کے حضور خصوصی دعائیں کی جائیں تا کہ انسانی زندگی کو اس تکلیف سے نجات مل سکے۔وزیراعظم نے کہا کہ وفاق اور صوبوں کے زیر اہتمام تمام مساجد میں نماز استسقاء کا اہتمام کیا جائے،موجودہ صورتحال میں باران رحمت کی شدید ضرورت ہے۔
