غذر۔(نمائندہ خصوصی):وزیراعظم محمد شہبازشریف نے متاثرین سیلاب کے لئے غذر کے بوبر ماڈل ویلج میں تمام ضروری سہولیات فراہم کرنے کی ہدایت کی ہے۔گلگت بلتستان کے ضلع غذر کے گائوں بوبرمیں 2022 کے سیلاب کے باعث تباہ ہونے والی بستی کی جگہ نئے ماڈل ویلیج کے افتتاح اورمتاثرین کو نو تعمیر شدہ گھروں کے ملکیتی کاغذات دینے کی تقریب سے خطاب کرتے ہوئے وزیراعظم نے کہا کہ وہ اگست 2022 میں یہاں آئے تھے جہا ں ہر طرف سیلاب کے بعد تباہی کے مناظر تھے ۔ موسمیاتی تبدیلیوں کے نتیجے میں تباہ کن سیلاب اور بارشوں نے پورے گائوں کو زمین بوس کر دیاتھا۔ آج یہاں نئی بستی تعمیر کی جاچکی ہے۔ متاثرہ خاندانوں کو ان کے گھروں کے ملکیتی کاغذات دیئے جا چکے ہیں۔وزیراعظم نے متاثرین کی بحالی ، آباد کاری اور تعمیر 
نو پر متعلقہ اداروں اور حکام کو شاباش دی اور ہدایت کی کہ نئےتعمیر شدہ گھروں کو موسم سرما میں رہنے کے قابل بنانے کا انتظام کیا جائے۔ ماڈ ل ویلج کے معیار کو جانچنے کے لئے کسی تیسرے فریق سے توثیق کرائے بغیر ادائیگیاں نہ کی جائیں اور سکول، ڈسپنری اور کھیل کے میدان سمیت تمام ضروری سہولتیں فراہم کی جائیں۔وزیر اعظم نے ڈسپنسری میں الٹراسائونڈ ، ایکسرے اور زچگی سمیت تمام ضروری سہولیات فوری فراہم کرنے کی بھی ہدایت کی۔ وزیراعظم نے بتایا کہ انہوں نے سیلاب متاثرہ بچی قندیل کے لئے 50 لاکھ روپے کے انڈوومنٹ فنڈ کا اعلان کیاتھا ، آج وہ فنڈ 67 لاکھ تک پہنچ چکاہے۔وزیراعظم نے متاثرین کو ان کےگھروں کے الاٹمنٹ لیٹرز تقسیم کئے ۔ قبل ازیں وزیراعظم نے بوبر ماڈل ویلج کاافتتاح کیا ۔ ا س موقع پر وزیراعظم کو نئے تعمیر شدہ گھروں میں فراہم کی جانے والی سہولیات اور معیار کے بارے میں بریفنگ دی گئی ۔ یہ ماڈل ویلج 110 کنال اراضی پر تعمیر کیا گیا ہے جس میں 62 گھرہے ۔ وزیراعظم کو بتایاگیا کہ 216 کلومیٹر گلگت شندور شاہراہ بھی تعمیر کی جا رہی ہے۔وزیراعظم نے اس منصوبے پر کام کی رفتار تیزکرنے کی ہدایت کی۔ قبل ازیں وزیراعلیٰ گلگت بلتستان حاجی گلبر خان نے مشکل اور آزمائش کی گھڑی میں گلگت بلتستان کی عوام کی مدد کرنے پر وزیراعظم محمد شہباز شریف اور وفاقی حکومت کا شکریہ اداکیا۔ اس موقع پر وفاقی وزرا اور اراکان اسمبلی بھی موجود تھے
وزیراعظم شہبازشریف نے غذر کےمتاثرین سیلاب کے لئے بوبر ماڈل ویلج کا افتتاح کیا، تمام ضروری سہولیات فراہم کرنے کی ہدایت
جواب دیں
ہماری ویب سائٹ پر تازہ ترین خبریں حاصل کریں۔
