اسلام آباد۔(نمائندہ خصوصی):اراکین سینیٹ نے روسی فیڈریشن کی فیڈرل اسمبلی کی فیڈریشن کونسل کی اسپیکر ویلنٹینا مٹونیکو کے حالیہ دورہ پاکستان کو پاکستان اورروس کے درمیان مختلف شعبوں میں تعاون کو مزید مضبوط بنانے کے لیے اہم قرار دیا ہے ۔پیر کوایوان بالا کے اجلاس میں سینیٹر روبینہ قائم خانی، شیری رحمن، پرویز رشید، کامران مرتضیٰ، دنیش کمار، فلک ناز، ذیشان خانزادہ، گردیپ سنگھ، فوزیہ ارشد اور حسنہ بانو نے ایک تحریک پیش کی جس میں روسی فیڈریشن کی فیڈرل اسمبلی کی فیڈریشن کونسل کی اسپیکر ویلنٹینا مٹونیکو کے حالیہ دورۂ پاکستان کو دونوں ممالک کے تعلقات میں سنگ میل قرار دیا
گیا ہے۔ اس تحریک میں اس بات پر زور دیا گیا کہ یہ دورہ پاکستان اور روس کے درمیان مختلف شعبوں میں تعاون کو مزید مضبوط بنانے کے عزم کا اعادہ کرتا ہےتحریک میں سینیٹ نے چیئرمین یوسف رضا گیلانی اور اسپیکر ویلنٹینا مٹونیکو کے درمیان دستخط شدہ مفاہمتی یادداشت کابھی ذکر کیا اور اس بات کوتسلیم کیاکہ یہ پارلیمانی سفارتکاری اور پارلیمانی دوستی گروپوں کے ذریعے پائیدار روابط کے قیام کی طرف ایک اہم قدم ہے۔سینیٹ نے ایم او یو میں بیان کردہ امن، تعاون، اور احترام کے مشترکہ اصولوں کو فروغ دینے کے لیے روس کے ساتھ اسٹریٹجک شراکت داری کو بڑھانے کے عزم کا اعادہ کیا۔سینیٹ نے اقتصادی، ثقافتی، اور سماجی شعبوں میں تعاون کو فروغ دینے کی بھی حوصلہ افزائی کی، جس کا مقصد تجارت، سرمایہ کاری، اور ثقافتی تبادلوں کے پروگراموں کو وسعت دینا ہے۔اس کے ساتھ تعلیمی اور تکنیکی شراکت داری کو فروغ دینے پر بھی زور دیا گیا ہے، تاکہ پاکستان اور روس کے تعلقات کو فروغ دیا جا سکے اورباہمی ترقی، علاقائی استحکام اور عالمی چیلنجز سے نمٹنے میں زیادہ مربوط اور مشترکہ نقطہ نظر اپنایا جا سکے۔
روسی فیڈریشن کی فیڈرل اسمبلی کی فیڈریشن کونسل کی سپیکر ویلنٹینا مٹونیکو کا حالیہ دورۂ پاکستان دونوں ممالک کے تعلقات میں سنگ میل ہے، اراکین سینٹ
