اسلام آباد(نمائندہ خصوصی):وزیر اعظم کے کوآرڈینیٹر رانا احسان افضل خان نے پاکستان تحریک انصاف کو انتباہ جاری کرتے ہوئے کہا ہے کہ ان کے اقدامات بالآخر مایوسی کا باعث بنیں گے۔ اپنے ایک یہ انٹرویو میں انہوں نے پی ٹی آئی کی سیاسی چالوں پر کڑی تنقید کرتے ہوئے مزید کہا کہ پی ٹی آئی کی بنیادی توجہ عوام کی خدمت کے بجائے اپنے ذاتی مفادات حاصل کرنا رہی ہے۔
انہوں نے نشاندہی کی کہ وزیراعظم شہباز شریف کی قیادت میں ملک ترقی کر رہا ہے اور استحکام میں خلل ڈالنے کی کسی بھی کوشش کو برداشت نہیں کیا جائے گا۔ آئینی بنچ سے متعلق ایک سوال کا جواب دیتے ہوئے انہوں نے کہا کہ حکومت ججوں کے انتخاب کے حوالے سے آئینی بنچ کے کسی بھی فیصلے کو اثر و رسوخ کے بغیر قبول کرے گی۔رانا احسان افضل نے اتحاد کی اہمیت پر بھی زور دیتے ہوئے تمام جماعتوں پر زور دیا کہ وہ ملک کی ترقی کے لیے مل کر کام کریں اور ریاستی اداروں کا احترام کریں۔
