وفاقی وزیر برائے منصوبہ بندی و ترقی پروفیسر احسن اقبال کی زیرِ صدارت کوپ۔29 کے حوالہ سے اجلاس

اسلام آباد۔(نمائندہ خصوصی)وفاقی وزیر برائے منصوبہ بندی ،ترقی ،اصلاحات وخصوصی اقدامات پروفیسر احسن اقبال کی زیرِ صدارت بدھ کوپاکستان میں کوپ۔29 کے لئے تیاریوں کے حوالہ سے اجلاس منعقد ہوا۔ اس اجلاس کا مقصد عالمی ماحولیاتی کانفرنس میں پاکستان کے ایجنڈے کو ترتیب دینا اور حتمی شکل دینا تھا۔ اجلاس میں وزارت موسمیاتی تبدیلی، وزارت خارجہ اور وزارت توانائی کے نمائندوں نے شرکت کی جہاں پاکستان کی ترجیحات پر تبادلہ خیال کیا گیا جس میں گرین ٹرانزیشن، گرین سرمایہ کاری کو فروغ دینا، ماحولیاتی مالیات میں اضافہ اور پائیدار آبی انتظام شامل ہیں۔احسن اقبال نے ماحولیاتی اقدامات میں علاقائی تعاون کی ضرورت اور توانائی کے گرین ذرائع میں منتقلی کی اہمیت پر زور دیا،یہ بھی فیصلہ ہوا کہ کوپ۔29 میں زیادہ سے زیادہ بین الاقوامی نمائندگی کو یقینی بنانے کے لئے اہم ممالک کے ساتھ رابطہ جاری رکھا جائے گا تاکہ پاکستان کے ماحولیاتی اہداف کو مضبوطی سے پیش کیا جا سکے۔ کوپ۔29 کا انعقاد 11 سے 22 نومبر تک باکو، آذربائیجان میں ہوگا۔