اسلام آباد۔(نمائندہ خصوصی ):چار معروف پاکستانی آئی ٹی کمپنیوں ریچ دی گلوب، آئی سی آئی ایل ٹیک، نارتھ بے سلوشنز اور سوفیزر نے ایمسٹرڈیم کے آر اے آئی کنونشن سینٹر میں یکم اور 2 اکتوبر 2024 کو منعقدہ اے آئی اور بگ ڈیٹا نمائش میں پاکستان کی نمائندگی کی۔ ٹریڈ ڈویلپمنٹ اتھارٹی آف پاکستان (ٹی ڈی اے پی) کے زیر اہتمام کمپنیوں نے اے آئی اور بگ ڈیٹا میں جدید ترین ٹیکنالوجی اور سلوشن پیش کیے جس سے پاکستان کو عالمی ٹیک (tech) میدان میں ایک اہم کھلاڑی کے طور پر متعارف کروایا گیا۔ ہیگ میں پاکستان کے سفارت خانے نے ان کمپنیوں کی شرکت کو فروغ دینے میں اہم کردار ادا کیا۔
ایونٹ کے منتظمین کے ساتھ مل کر سفارت خانے نے پاکستان پویلین بنوایا اور شرکت کرنے والی کمپنیوں کے لیے بوتھ کی سہولت فراہم کی۔ مزید برآں سفارت خانے نے پاکستانی آئی ٹی فرموں کی موجودگی کو فعال طور پر فروغ دیا، مختلف شعبوں سے آنے والوں کو ملک کے اعلیٰ ٹیک ٹیلنٹ سے متعارف کروایا۔تعلقات کو مزید مضبوط بنانے اور کاروباری تعاون کو فروغ دینے کے لیے، سفارت خانے نے ایک نیٹ ورکنگ ڈنر کا اہتمام کیا جس میں پاکستانی آئی ٹی فرموں اور ڈچ کمپنیوں کے اہم سٹیک ہولڈرز کو 
اکٹھا کیا گیا۔اس اجتماع نے پاکستانی اور ڈچ دونوں کاروباروں کو اے آئی، بگ ڈیٹا اور اس سے آگے کے شعبوں میں تعاون کے مواقع پر تبادلہ خیال کرنے کے لیے ایک انمول پلیٹ فارم فراہم کیا۔اس موقع پر بات کرتے ہوئے ہالینڈ میں پاکستان کے قونصلر برائے تجارت اور سرمایہ کاری محمد شفیق حیدر ورک نے کہا کہ ان چار کمپنیوں کی شرکت اے آئی اور بگ ڈیٹا کے شعبوں میں پاکستان کی بڑھتی ہوئی مہارت کو ظاہر کرتی ہے۔ اے آئی اور بگ ڈیٹا ایگزیبیشن یورپ2024 نے دنیا بھر سے ٹاپ ٹیک کمپنیوں کو اکٹھا کیا جو پاکستانی آئی ٹی فرموں کو اپنی اختراعات کی نمائش اور بین الاقوامی شراکت داری کو فروغ دینے کا ایک بہترین موقع فراہم کرتا ہے۔
