سبز معیشت کے اہداف کے حصول کے لیے شہروں کو ماحولیاتی طور پر پائیدار بنانا ناگزیر ہے، رومینہ خورشید عالم

اسلام آباد۔(نمائندہ خصوصی )وزیر اعظم کی کوآرڈینیٹر برائے موسمیاتی تبدیلی اور ماحولیاتی رابطہ رومینہ خورشید عالم نے کہا کہ موسمیاتی تبدیلی کی وجہ سے شدید موسمی حالات بالخصوص سخت گرمی اور شہری علاقوں میں سیلاب سے لوگوں کی زندگیوں، معاش اور عوامی انفراسٹرکچر کو شدید خطرات لاحق ہیں۔ ان خیالات کا اظہار انہوں نے جمعرات کو یہاں اجلاس کی صدارت کرتے ہوئے کیا جس میں کیپٹل ڈویلپمنٹ اتھارٹی (سی ڈی اے) کے چیئرمین محمد علی رندھاوا اور دیگر متعلقہ حکام شریک ہوئے جس میں انہوں نے کئی اقدامات کا خاکہ پیش کیا جن کا مقصد دارالحکومت کو ماحولیاتی طور پر مستحکم ماڈل میں تبدیل کرنا ہے۔وزیر اعظم کی موسمیاتی معاون نے پالیسیوں کو نافذ کرنے پر زور دیا جو نہ صرف ہمیں فوری طور پر ماحولیاتی اور موسمیاتی تبدیلی سے متعلق چیلنجز سے نمٹنے میں مدد دے سکتے ہیں بلکہ شہری علاقوں میں طویل مدتی پائیداری اور معیار زندگی کو بھی فروغ دیں گی۔ انہوں نے کہا کہ شہروں کو موسمیاتی طور پر لچکدار بنانا کثیر جہتی نقطہ نظر کو شامل کیے بغیر ممکن نہیں جس میں منصوبہ بندی، بنیادی ڈھانچے کی ترقی، کمیونٹی کی شمولیت اور متعلقہ پالیسی پر عمل درآمد شامل ہے۔وزیر اعظم کی ماحولیاتی معاون نے کہا کہ ملک کے متعدد شہروں کو موسمیاتی خطرات کا سامنا ہے جن میں کراچی، لاہور، اسلام آباد اور پشاور شامل ہیں۔ رومینہ خورشید عالم نے اجلاس کے شرکاءکو بتایا کہ موسمیاتی تبدیلی اور ماحولیات کی وزارت شہروں کو ماحولیات کے لحاظ سے پائیدار اور موسمیاتی لچکدار بنانے کے لیے پائیدار شہری ماحول بنانے کے لیے تمام تر اقدامات اور پالیسیوں سمیت فریم ورک کو نافذ کر رہی ہے تاکہ شہری موسمیاتی تبدیلی کے اثرات کا مقابلہ اور معیار زندگی کو بہتر بنا سکیں۔ انہوں نے اس بات پر زور دیا کہ اسلام آباد اپنے سرسبز و شاداب پودوں اور پھولدار پودوں میں اضافہ کرے گا جو کہ پائیداری کے اہداف کے حصول میں دوسرے شہروں کی تقلید کے لیے خود کو ایک معیار کے طور پر کھڑا کرے گا۔انہوں نے آب و ہوا سے متعلق صحت کے مسائل کو حل کرنے کی اہمیت پر بھی روشنی ڈالی اور پولن الرجی کو کم کرنے کے لیے کاغذی شہتوت کے درختوں کو منتقل کرنے کی وکالت کی جو رہائشیوں کو متاثر کرتی ہیں۔ رومینہ خورشید عالم نے کہا کہ اسلام آباد بھر کے پارکوں کو بہتر بنایا جائے تاکہ شہر کی سرسبز جگہوں کو بڑھایا اور رہائشیوں کے لیے تفریحی مقامات کو بہتر بنایا جاسکے۔ سی ڈی اے کے چیئرمین محمد علی رندھاوا نے رومینہ خورشید عالم کو شہری منصوبہ بندی، قابل تجدید توانائی، ماحولیاتی صحت، نقل و حمل، زیرو ویسٹ اور پانی کے انتظام پر مرکوز مختلف منصوبوں کے بارے میں بریفنگ دیجس کا مقصد اسلام آباد کو ایک سمارٹ سٹی کے طور پر ترقی دینا ہے۔ اجلاس کا اختتام بہارہ کہو کے قریب 700 ایکڑ پر محیط جنگلات کے منصوبوں پر تعاون کے لیے وزارت موسمیاتی اور سی ڈی اے کے درمیان ایک معاہدے پر ہوا۔ چیئرمین سی ڈی اے نے اجلاس کو بتایا کہ سی ڈی اے پورے شہر میں سائیکل روٹ کا ایک وسیع نیٹ ورک تیار کر رہا ہے۔