لاہور۔(نمائندہ خصوصی )سینئر صوبائی وزیر مریم اورنگزیب نے کہا ہے کہ زہریلے دھوئیں کی وجہ بننے والے تمام ذرائع کا سدباب اولین ترجیح ہے،زگ زیگ ٹیکنالوجی پر منتقل نہ ہونےوالے بھٹوں کےخلاف آپریشن تیز کیاجائے گا۔ ان خیالات کا اظہار انہوں نے ہفتہ کے روز جاری اپنے ایک بیان میں کیا ۔مریم اورنگزیب نے کہا کہ سموگ سے پہلے سموگ سے بچائو کیلئے اقدامات کی رفتار 
مزید تیز کر دی گئی ہے ، سموگ کو ختم کرنے کیلئے سب کو اپنی ذ مہ داری سمجھنا ہو گی اور قانون پر عمل کرنا ہو گا کیونکہ یہ زندگیوں کا معاملہ ہے۔ انہوں نے کہا کہ وزیراعلی پنجاب مریم نواز کی ہدایت پر ماحول دشمن بھٹوں کےخلاف آپریشن تیز کردیاگیا ہے، ماحول دشمن بھٹوں، زہریلے دھوئیں کی وجہ بننے والے تمام ذرائع کا سدباب ہماری اولین ترجیح ہے،زگ زیگ ٹیکنالوجی پر منتقل نہ ہونے والے بھٹوں کے خلاف آپریشن مزید تیز کیاجائے گا۔مریم اورنگزیب نے کہا کہ پاکپتن، بہاولپور، حافظ آباد اور شیخوپورہ سمیت پنجاب کے دیگر شہروں میں محکمہ ماحولیات نے زگ زیگ ٹیکنالوجی پر منتقل نہ ہونے والے بھٹے گرادئیے ہیں ،مئی سے اگست تک کے چار ماہ کے دوران 231بھٹے گرائے گئے۔ انہوں نے کہا کہ ماحولیاتی قوانین کی خلاف ورزی پر مقدمات کا اندراج اور سزائیں بھی ہوں گی، ماحول کو بہتر بنانے میں محکمہ ماحولیات اور ضلعی انتظامیہ کے افسران اور عملے کی کارکردگی قابل ستائش ہے ۔
زہریلے دھوئیں کی وجہ بننے والے تمام ذرائع کا سدباب اولین ترجیح ہے، مریم اورنگزیب
