اسلام آباد۔(نمائندہ خصوصی ):پاکستان میں ملائیشیا کے ہائی کمشنر داتو محمد اظہر مزلان نے پاکستان کی نئی تعینات ہونے والی سیکرٹری خارجہ، سفیر آمنہ بلوچ سے ملاقات کی جنہوں نے 11 ستمبر 2024 کو باضابطہ طور پر اپنےعہدے کا چارج سنبھالا۔ ملاقات کے دوران سفیر داتو اظہر نے سفیر آمنہ بلوچ کو بطور سیکرٹری خارجہ تعیناتی پر دل کی گہرائیوں سے مبارکباد اور نیک خواہشات کا اظہار کیا۔2019 سے 2023 تک ملائیشیا میں پاکستان کی ہائی کمشنر کی حیثیت سے اپنے وسیع سفارتی تجربے کو مدنظر رکھتے ہوئےسفیر داتو اظہر نے اس یقین کا اظہار کیا کہ ملائیشیا اور پاکستان کے درمیان بہترین دوطرفہ تعلقات کو مزید بلندیوں تک لے جایا جائے گا۔ ہفتہ کو جاری پریس ریلیز کے مطابق ملاقات میں پاکستان میں ملائیشیا کے ہائی کمشنر داتو محمد اظہر مزلان نے کہا کہ دونوں ممالک کے درمیان اسٹریٹجک شراکت داری کو آگے بڑھانے کے مقصد سے دونوں فریقوں نے وسیع تعمیری بات چیت کی۔انہوں نے کہا کہ دونوں ممالک نے ابھرتے ہوئے شعبوں جیسے کہ آٹو موٹیو انڈسٹری، بلیو
اکانومی، تعلیم، توانائی کی پیداوار اور ہنر مند اور نیم ہنر مند کارکنوں کے لیے تکنیکی اور پیشہ ورانہ تعلیم و تربیت میں نئے تعاون کی تلاش کا اعادہ کیا۔سفیر داتو اظہر نے اس بات پر زور دیا کہ اس سے قبل سب سے زیادہ دو طرفہ تجارت 1.8 بلین امریکی ڈالر ریکارڈ کی گئی تھی اس کے باوجود ترقی کے بے پناہ امکانات موجود ہیں اور دونوں ممالک کو تجارت اور سرمایہ کاری کے نئے اقدامات کے ذریعے اس تعداد کو بڑھانے کی کوششیں کرنی چاہئیں۔سفیر داتو اظہر نے آسیان کی جانب سے پیش کیے گئے مواقع پر روشنی ڈالی بالخصوص ملائیشیا کی آسیان مارکیٹ کے گیٹ وے کے طور پر اسٹریٹجک پوزیشن، جو پاکستان کے لیے خطے میں اپنی اقتصادی مصروفیت کو بڑھانے کے لیے بے پناہ امکانات کی پیشکش کرتی ہے۔ملائیشیا 2025 میں آسیان کی چیئرمین شپ سنبھالے گا اور دونوں فریقوں نے فلسطین اور افغانستان کی صورتحال سمیت باہمی امور پر بھی بات کی ۔ملائیشیا کے وزیر اعظم کے پاکستان کے آئندہ دورے کی تیاری کر رہے ہیں سفیر داتو اظہر نے دونوں ممالک کے درمیان تعلقات کی بحالی میں اس دورے کی اہمیت کو تسلیم کیا۔ پانچ سال پہلے وزیر اعظم کے آخری دورے کو دیکھتے ہوئے انہوں نے زور دیا کہ تعلقات کو مضبوط بنانے کے لیے وقت بہت اہم ہے۔ملاقات میں تجارت، حلال تعاون، فضائی رابطے اور سیاحت کے شعبے پر توجہ مرکوز کرتے ہوئے دورے کے ممکنہ ڈیلیوریبلز پر بھی بات ہوئی۔ یہ ملاقات ملائیشیا اور پاکستان کے درمیان تعاون کو مزید گہرا کرنے اور دیرینہ برادرانہ تعلقات کو مستحکم کرنے کی جانب ایک نئے قدم کی نشاندہی کرتی ہے۔اس بات کو مدنظر رکھتے ہوئے کہ سیکرٹری خارجہ اور ہائی کمشنر دونوں کو ملائیشیا میں سابقہ دور میں اور بعد میں ملائیشیا پاکستان تعلقات کی نگرانی کرنے والے وزارت خارجہ میں انڈر سیکرٹری کے طور پر کام کرنے کا اعزاز حاصل ہوا ہے۔
ملائیشیا کے ہائی کمشنر کی سیکرٹری خارجہ سے ملاقات، تعیناتی پر دل کی اتھاہ گہرائیوں سے مبارکباد اور نیک خواہشات کا اظہار
