اسلام آباد(نمائندہ خصوصی ):پاکستان نے ممتاز کشمیری رہنما سید علی گیلانی کی تیسری برسی پر انھیں شاندار الفاظ میں خراج عقیدت پیش کیا ہے ۔ دفتر خارجہ کی ترجمان ممتاز زہرہ بلوچ نے جمعرات کو یہاں پریس بریفنگ میں کہا کہ شدید اور بے پناہ مشکلات کے باوجود کشمیری عوام کے حق خودارادیت کے لیے سید علی گیلانی کا غیر متزلزل عزم بے مثال تھا۔ترجمان نے کہا کہ سید علی گیلانی کشمیریوں کی حق خود ارادیت کی جدوجہد
کی سچی آواز تھے جو طویل عرصے تک گھر میں نظربند رہنے کے بعد یکم ستمبر 2021 کو انتقال کرگئے تھے۔ انہوں نے کہا کہ ہم انصاف اور آزادی کے لیے سید علی گیلانی کی زندگی بھر کی جدوجہد کو زبردست خراج تحسین اور ان کی یاد کو خراج عقیدت پیش کرتے ہیں۔ترجمان نے کہا کہ ہم اقوام متحدہ کی سلامتی کونسل کی قراردادوں کے مطابق تنازعہ جموں و کشمیر کے منصفانہ اور پرامن حل کے لیے اپنے کشمیری بھائیوں اور بہنوں کی سیاسی، سفارتی اور اخلاقی حمایت کے اپنے عزم کا اعادہ بھی کرتے ہیں۔
سید علی گیلانی کشمیریوں کے حق خود ارادیت کیلئے جاری جدوجہد کی سچی آواز تھے، ترجمان دفتر خارجہ ممتاز زہرہ بلوچ
