اسلام آباد( نمائندہ خصوصی)وزیراعظم شہباز شریف نے بحرین کے شاہ حمد بن عیسیٰ الخلیفہ کو ٹیلی فون کرکے عید الاضحی کے پر مسرت موقع پر مبارکباد دی۔وزیراعظم شہباز شریف نے بحرین کے شاہ حمد بن عیسیٰ الخلیفہ سے ٹیلیفونک رابطہ کیا اور عید الاضحی کے پر مسرت موقع پر مبارکباد دی۔
وزیراعظم شہباز شریف نے گفتگوکرتے ہوئے مملکت بحرین کے برادرعوام کی مسلسل ترقی اور خوشحالی کے لیے نیک خواہشات کا بھی اظہار کیا۔وزیراعظم نے پاکستان اور بحرین کے درمیان دیرینہ برادرانہ تعلقات کا اعادہ کرتے ہوئے اس بات پر روشنی ڈالی کہ قریبی تعلقات نے مختلف شعبوں بالخصوص دوطرفہ تجارت اور سرمایہ کاری کے فروغ میں گہرے دوطرفہ تعاون کے اہم مواقع فراہم کیے ہیں۔ وزیراعظم کی جانب سے عید کی پرتپاک مبارکباد کا جواب دیتے ہوئے، شاہ حمد بن عیسیٰ الخلیفہ نے پاکستانی عوام کے لیے نیک خواہشات کا اظہار کیا۔ انہوں نے دونوں ممالک کے عوام کے مفاد کے لیے باہمی تعاون کو وسیع کرنے کے عزم کا اظہار کیا۔شاہ حمد بن عیسیٰ الخلیفہ نے مزید کہا کہ پاکستان اور بحرین کے درمیان دیرینہ دوستانہ تعلقات ہیں جن کی جڑیں مشترکہ ایمان، باہمی افہام و تفہیم اور مشترکہ مفادات پر مبنی ہیں۔
