جمہوریت کی بقااور سلامتی کے لئے صحافت کا وجود ناگزیر ہے۔ گورنر سندھ

کراچی۔(نمائندہ خصوصی )گورنرسندھ کامران خان ٹیسوری نے کہا ہے کہ قوموں کی تعمیر میں صحافت کا کلیدی کردار ہے،جمہوریت کی بقاءاور سلامتی کے لئے صحافت کا وجود ناگزیر ہے۔گورنر ہائوس سے جاری اعلامیہ کے مطابق ان خیالات کا اظہار انہوں نے کراچی پریس کلب کے عہدیداروں سے گورنرہائوس میں ملاقات کے دوران گفتگو کرتے ہوئے کیا۔ملاقات میں صدر سعید سربازی، سیکریٹری شعیب احمد، جوائنٹ سیکریٹری محمد منصف اور دیگر گورنگ باڈی کے ممبران شامل تھے۔ ملاقات میں صحافی برادری کی فلاح و بہبود پر بات چیت ہوئی۔گورنرسندھ نے صحافی برادری کو درپیش مشکلات کے حل کی یقین دہانی بھی کرائی۔گورنرسندھ نے مزید کہا کہ صحافت کو معاشرہ کی آنکھ مانا جاتا ہے ،سماج کی اچھائیاں اور برائیاں صحافت کے ذریعہ ہی سامنے آتی ہیں۔گورنر سندھ نے کہا کہ جدید دور میں، صحافت مکمل طور پر نیا رخ اختیار کر چکی ہے کیونکہ آج صحافت عوامی رائے پر اثرانداز ہورہی ہے بالخصوص عوام کا معلومات کے حصول کے لئے اعتماد صحافت کی کامیابی کی دلیل ہے۔انہوں نے کہا کہ صحافت ہر دور میں طاقتور، بااثر اور متاثر کن حقیقت رہی ہے۔گورنر سندھ نے کہا کہ کراچی پریس کلب کے تمام مسائل ترجیحی بنیادوں پر حل اور صحافیوں کی رہائشی اسکیم ، وفاقی فنڈنگ پر متعلقہ حکام سے بات کروں گا۔ بعد ازاں صحافیوں نے امید کی گھنٹی ، راشن بیگز اور آئی ٹی مارکی کا دورہ بھی کیا۔ کراچی پریس کلب کے صدر سعید سربازی نے کہا کہ گورنر سندھ کی فلاحی اقدامات معاشرہ کے لئے اہم ثابت ہورہے ہیں۔انہوں نے مزید کہا کہ صحافی برادری کے مسائل پر گورنر سندھ کی دلچسپی خوش آئند ہے