برہان وانی جیسے نوجوان اپناحق خودارادیت حاصل کرنے کے لیے پر عزم ہیں، کائرہ مشیر امور کشمیر کا برہان مظفر وانی کی چھٹی برسی کے موقع پر شہید کو زبردست خراج عقیدت

اسلام آباد( نمائندہ خصوصی)مشیر امور کشمیر قمر زمان کائرہ نے شہید کشمیری نوجوان برہان مظفر وانی کی چھٹی برسی کے موقع پر شہید کو زبردست خراج عقیدت پیش کرتے ہوئے کہاہے کہ برہان مظفر وانی شہید مقبوضہ کشمیر میں بھارتی بربریت کے خلاف مزاحمت کی ایک بے مثال علامت ہیں۔

انہوںنے کہاکہ برہان وانی نے مقبوضہ کشمیرکی پڑھی لکھی نوجوان نسل میں جدوجہد کی ایک نئی روح پھونکی، برہان مظفر وانی جیسے لاکھوں نوجوان اپناحق خودارادیت حاصل کرنے کے لیے پر عزم ہیں۔ قمر زمان کائرہ نے کہاکہ قابض بھارتی افواج کشمیریوں بلخصوص نوجوانوں کا بے دریغ قتل عام کررہی ہیں، مقبوضہ وادی میں روزانہ نہتے کشمیری نوجوانوں کو نام نہاد سرچ آپریشنز میں شہید کردیا جاتا ہے۔ قمرزمان کائرہ نے کہاکہ بھارت نے 40 لاکھ غیر ریاستی افراد کو مقبوضہ کشمیر کی شہریت دی ہے، بھارت مقبوضہ کشمیر کی ڈیمو گرافی تبدیل کرکے مسلمان اکثریت کو اقلیت میں تبدیل کرنا چاہتا ہے۔ انہوںنے کہاکہ غیور اور بہادر کشمیری بھارت کے اوچھے ہتھکنڈوں کو کسی صورت میں کامیاب نہ ہونے دیں گے۔

انہوںنے کہاکہ پاکستان دنیا کے تمام فورمز پر اپنے کشمیری بہنوں اور بھائیوں کی بھرپور حمایت جاری رکھے ہوئے ہے، بلاول بھٹو زرداری مسئلہ کشمیر کو دنیا کے تمام فورمز پر بھرپور انداز میں اجاگر کر رہے ہیں۔