اسلام آباد۔(نمائندہ خصوصی ):وزیراعظم محمد شہباز شریف نے دریائے چناب کے ملحقہ علاقوں میں ممکنہ شدید طغیانی اور پنجاب کے شہری علاقوں میں بارشوں سے سیلابی صورتحال کے متوقع خطرے سے نمٹنے کیلئے این ڈی ایم اے، پی ڈی ایم ایز اور دیگر متعلقہ اداروں کو ہائی الرٹ رہنے کی ہدایت کرتے ہوئے کہا ہے کہ نہروں، ندی نالوں اور دریا کے گرد متوقع سیلابی ریلوں کو روکنے کیلئے پیشگی حفاظتی اقدامات کئے جائیں۔جمعرات کو وزیراعظم آفس کے میڈیا ونگ سے جاری کردہ بیان کے مطابق وزیراعظم نے کہا کہ 25 اگست تک مون سون کے متوقع شدید سپیل کی ڈیش بورڈ سے خود نگرانی کر رہا ہوں،این ڈی ایم اے، 
پی ڈی ایم ایز، ریسکیو و ریلیف کے ادارے، سول ڈیفنس اور ضلعی انتظامیہ دریائے چناب کے کیچمنٹ ایریا اور بارشوں سے سیلابی صورتحال کے خطرے سے دوچار شہروں میں عوام کی حفاظت کیلئے ہر دم تیار رہیں،کسی بھی ہنگامی صورتحال میں لوگوں کے انخلاء و ریسکیو، نکاسی آب، ادویات، خیمے و دیگر امدادی اشیاء کی ترسیل کیلئے مکمل تیاری یقینی بنائی جائے۔انہوں نے کہا کہ بارشوں و سیلابی صورتحال سے متوقع طور پر متاثر ہونے والے علاقوں میں شہریوں کو صورتحال سے مکمل آگاہ رکھا جائے،نہروں، ندی نالوں اور دریا کے گرد متوقع سیلابی ریلوں کو روکنے کیلئے پیشگی حفاظتی اقدامات کئے جائیں۔ وزیراعظم نے ہدایت کی کہ یقینی بنایا جائے کہ شہریوں کو ہر پل صورتحال پر نظر رکھنے کیلئے این ڈی ایم اے کی ڈیزاسٹر الرٹ ایپلی کیشن کے بارے آگاہی پہنچے۔
وزیراعظم محمد شہباز شریف کی بارشوں اور سیلابی صورتحال سے نمٹنے کے لئے این ڈی ایم اے اور دیگر متعلقہ اداروں کو ہائی الرٹ رہنے کی ہدایت
جواب دیں
ہماری ویب سائٹ پر تازہ ترین خبریں حاصل کریں۔
