اسلام آباد۔(نمائندہ خصوصی ):وفاقی وزیر امور کشمیر وگلگت بلتستان و سیفران انجینئر امیر مقام نے ممتاز کشمیری رہنما یاسین ملک کی صحت بگڑنے کی اطلاعات پر گہری تشویش کا اظہار کرتے ہوئے کہا ہے کہ بھارتی جیلوں میں اس سے قبل بھی کشمیری قائدین اور اسیران کی شہادتیں ہوچکی ہیں ۔پیرکو اپنے ایک بیان میں وفاقی وزیر نے کہا کہ بہادر کشمیری راہنما یاسین 
ملک کی صحت تشویشناک حد تک بگڑنا نہایت پریشانی کا باعث ہے ۔ انہوں نے یاسین ملک اور دیگر کشمیری قائدین کی زندگی کو خطرات کے حوالے سے سیکرٹری جنرل اقوام متحدہ اور عالمی اداروں کو خط لکھنے کا بھی اعلان کیا ۔انہوں نے کہا کہ عالمی برادری کو خط لکھ کر یاسین ملک اور دیگر اسیر کشمیری قائدین کی حالت زار سے آگاہ کروں گا ،بھار جیلوں میں اس سے قبل بھی کشمیری قائدین اور اسیران کی شہادتیں ہوچکی ہیں ۔امیرمقام نے کہا کہ کورونا وباءکے دنوں میں بھی مقبوضہ جموں وکشمیر اور بھارتی جیلوں میں کشمیری اسیران کو صحت کی سہولیات سے محروم رکھا گیا تھا ،تہاڑ جیل میں جھوٹے مقدمات میں قید یاسین ملک کو صحت کی بہترین سہولیات فراہم کی جائیں ۔انہوں نے کہا کہ عالمی برادری، اقوام متحدہ کے انسانی 
حقوق کے ادارے یاسین ملک سمیت دیگر کشمیری قائدین کی صحت وسلامتی کو لاحق سنگین خطرات پر فوری توجہ دیں ۔ انہوں نے کہاکہ بھارتی حکومت مقبوضہ جموں وکشمیر کے سیاسی راہنماﺅں اور قیدیوں کے ساتھ دہشت گردوں والا سلوک بند کرے ،بھارتی حکومت قید کشمیری قائدین کو صحت کی سہولیات نہ دے کر اُن کے قتل کی مذموم حکمت عملی پر کاربند ہے ،یاسین ملک کو کچھ ہوا تو بھارت حکمران اس کے ذمہ دار ہوں گے۔وفاقی وزیر امور کشمیر انجینئر امیرمقام نے کشمیری قائدین کے ساتھ مکمل یک جہتی کا اظہارکیا۔
وفاقی وزیر امور کشمیر انجینئر امیر مقام کا ممتاز کشمیری رہنما یاسین ملک کی صحت بگڑنے کی اطلاعات پر گہری تشویش کا اظہار
