اسلام آباد۔(اسپورٹس رپورٹر )کئی کتابوں کے مصنف، گولڈ میڈلسٹ کالم نویس عمران ملک نے پیرس اولمپکس میں گولڈ میڈل جیتنے اور جیولن تھرو میں اولمپک ریکارڈ توڑنے والے مایہ ناز قومی ہیرو ارشد ندیم پر کتاب لکھنے اور بین الاقوامی معیار کی فلم بنانے کا اعلان کیا ہے۔ ہفتہ کو اپنے ایک بیان میں انہوں نے کہا کہ ارشد ندیم کی کامیابی کو اقوام عالم میں بہت سراہا جا رہا ہے اور اس کی اس عظیم کامیابی کی وجہ سے پاکستان کو بھی دنیا بھر میں بہت پزیرائی ملی ہے۔ خاص طور پر ہمارے ہمسایہ ممالک میں پاکستان کے بہت چرچے ہو رہے ہیں اور ارشد ندیم کی زندگی اور کامیابیوں کے بارے میں مختلف چینلز پر 
پروگرام دکھائے جا رہے ہیں۔انہوں نے مزید کہا کہ ایک غریب گھرانے سے تعلق رکھنے والا ارشد ندیم جس کے پاس بین الاقوامی معیار کا سامان اورمناسب سہولیات بھی دستیاب نہیں تھیں اس نے اپنی انتھک محنت، لگن، جدو جہد اور جذبے کے ساتھ وہ کر دکھایا جس نے پوری دنیا کو حیران کر دیا۔ اس کی فتح نے پاکستان کو وہ مقام دلایا جس کا تصور بھی نہیں کیا جا سکتا۔عمران ملک نے کہا کہ ارشد ندیم کی زندگی پر لکھی جانے والی کتاب اور بنائی جانے والی فلم موجودہ اورآنے والی نسلوں کیلئے مشعل راہ ہو گی۔ ہمارے نوجوان ارشد ندیم کی انتھک محنت، جدو جہد اور کامیابی سے بہت کچھ سیکھ سکیں گے جس نے مشکل سے مشکل حالات میں بھی اپنی محنت اور حوصلے کو کم نہیں ہونے دیا اور وہ کچھ کر دکھایا جسے تاریخ میں سنہری حروف سے لکھا جائے گا اور پمیشہ یاد رکھا جائے گا۔ ارشد ندیم یقیناً فخر جہاں ہیں۔
