سعودی پریس اتاشی ڈاکٹر نائف العتیبی کی پیرس اولمپکس میں ارشد ندیم کی گولڈ میڈل جیتنے کی تاریخی کامیابی پر پاکستانی عوام کو دل کی گہرائیوں سے مبارکباد

اسلام آباد۔(نمائندہ خصوصی ):سعودی پریس اتاشی ڈاکٹر نائف العتیبی نے پیرس اولمپکس میں ارشد ندیم کی گولڈ میڈل جیتنے کی تاریخی کامیابی پر پاکستانی عوام کو دل کی گہرائیوں سے مبارکباد پیش کی ہے۔ ہفتہ کو اپنے مبارکباد کے پیغام میں انہوں نے کہا کہ پاکستانی جیولن تھرو ارشد ندیم نے 92.97 میٹر تھرو کے ساتھ اولمپک ریکارڈ توڑ کر ایک یادگار کارنامہ انجام دیا جس سے ان کی قوم کے لیے بہت بڑا فخر ہے۔ڈاکٹر العتیبی نے ارشد ندیم کی شاندار کارکردگی کی تعریف کی اور اسے نہ صرف پاکستان بلکہ پوری مسلم دنیا کے لیے ایک اہم سنگ میل قرار دیا۔انہوں نے کہا کہ یہ تاریخی جیت پاکستانی عوام کی جزبہ اور لگن کا منہ بولتا ثبوت ہے۔انہوں نے سعودی عرب اور پاکستان کے درمیان قریبی برادرانہ تعلقات پر بھی روشنی ڈالی۔انہوں نے مزید کہا کہ پاکستانی کھلاڑیوں کی کامیابی پر مملکت میں خوشی منائی گئی۔ انہوں نے امید ظاہر کی کہ یہ فتح مزید کامیابیوں کی حوصلہ افزائی کرے گی اور دونوں ممالک کے درمیان دوستی کے بندھن کو مزید مضبوط کرے گی۔سعودی پریس اتاشی نے عالمی سطح پر ارشد ندیم کی شاندار کامیابی پر مشترکہ فخر پر زور دیتے ہوئے کھیلوں کے میدان میں پاکستان کی مسلسل کامیابیوں کی خواہش کی۔