پاکستان انٹرنیشنل ایئر لائن نے فیصل آباد سے جدہ کے لئے پروازوں کا آغاز کر دیا

اسلام آباد۔(نمائندہ خصوصی ):پاکستان انٹرنیشنل ایئر لائن (پی آئی اے) نے فیصل آباد سے جدہ کے لئے پروازوں کا آغاز کر دیا، پہلی پرواز روانہ ہوگئی ، ہفتے میں دو پروازیں دوطرفہ چلائی جائیں گی ۔ ترجمان پی آئی اے عبداللہ حفیظ خان کی طرف سے جمعہ کو جاری بیان کے مطابق پی آئی اے نے فیصل آباد سے جدہ کے لیے دو طرفہ پروازوں کا آغاز کیا ہے، ہفتہ وار دو پروازیں فیصل آباد سے براہ راست جدہ روانہ ہوں گی۔ترجمان نے کہا کہ ان پروازوں کی دوبارہ شروعات سے خاص طور پر عمرہ زائرین کو خصوصی سہولیات دستیاب ہوں گی۔ پہلی پرواز پی کے 763 سے 170 عازمین عمرہ کو چیف کمرشل آفیسر نوشیروان عادل نے رخصت کیا۔ پی آئی اے اپنے مسافروں کو براہ راست سفری سہولیات کی فراہمی کے لئے ہمیشہ کوشاں رہتی ہے۔ نوشیروان عادل نے کہا کہ جدہ کی پروازوں سے سعودی عرب میں روزگار کے سلسلے میں مقیم افراد کو بھی وطن واپسی کے لئے براہ راست سفر کی سہولت میسر آئے گی۔فیصل آباد کی کاروباری برادری نے پی آئی اے کی جدہ کے لئے براہ راست پروازوں کا خیر مقدم کیا ہے۔ ایئرپورٹ پر پی آئی اے کے ڈسٹرکٹ منیجر شاہد حسین، سٹیشن منیجر محمد عرفان اور دیگر ایجنسیوں کے افسران نے مسافروں کو رخصت کیا۔