اسلام آباد۔(نمائندہ خصوصی ):وزیرمملکت برائے خزانہ علی پرویز ملک نے کہا ہے کہ حکومتی اقدامات کے نتیجے میں معیشت کے کلیدی اشاریے مثبت ہیں، زرمبادلہ کے ذخائر میں اضافہ ہو رہا ہے، مہنگائی میں کمی آ رہی ہے جبکہ سٹاک مارکیٹ میں تیزی سے معیشت پر سرمایہ کاروں کے اعتماد کی عکاسی ہو رہی ہے۔ انہوں نے یہ بات جمعہ کو یہاں پاکستان میں فرانس کے سفیر نکولس گالے سے ملاقات کے دوران گفتگوکرتےہوئے کہی۔ وزیر مملکت نے فرانسیسی سفیر کو قومی معیشت کی مجموعی صورتحال سے آگاہ کیا اور کہاکہ اہم معاشی اشاریے بہتری کی عکاسی کررہے ہیں۔بین الاقوامی ریٹنگ ایجنسیوں نے پاکستان کی کریڈٹ ریٹنگ بہتر کر دی ہے ۔انہوں نے کہاکہ نجکاری اور توانائی کے شعبہ میں اصلاحات ، سرکاری ملکیتی اداروں کی ری سٹرکچرنگ سمیت مجموعی طورپر ڈھانچہ جاتی اصلاحات کا عمل آگے بڑھایا جا رہا ہے۔ ایف بی آ ر کی ڈیجیٹلائزیشن کا عمل
جاری ہے۔ ا س ضمن میں میکنزی کی خدمات حاصل کی گئی ہیں۔ حکومت ٹیکس کی بنیاد میں وسعت اور ٹیکس کے نظام میں شفافیت لانے میں پر عزم ہے۔ وفاقی بجٹ میں ٹیکس کی بنیاد کو وسیع کرنے کے لئے ایک پروگرام رکھا گیا ہے۔حکومت نان فائلرز کو فائلر بنانے کے لئے اہم اقدامات کررہی ہے۔ ملاقات میں کسٹم اور ان لینڈ ریونیو کے منصوبوں کا بھی جائزہ لیاگیا اور بتایاگیا کہ ڈیجیٹلائزیشن کے ذریعے ان اداروں کی آپریشنل استعدادمیں اضافہ کیا جائےگا۔ فرانسیسی سفیر نے اصلاحات کے عمل پر حکومت کی تعریف کی اور کہا کہ فرانس کی حکومت اس ضمن میں تکنیکی معاونت فراہم کرے گی۔انہوں نے پاکستانی معیشت کے استحکام کی تائید کی اور اس امید کااظہار کیا کہ معیشت کے تمام شعبے میں پیشرفت کا سلسلہ جاری رکھیں گے۔ فریقین نے دوطرفہ اقتصادی تعلقات کو فروغ دینے ، باہمی تجارت میں اضافہ اور سرمایہ کاری کے نئے مواقع تلاش کرنے پر اتفاق کیا۔
