اسلام آباد۔(نمائندہ خصوصی ):نیشنل ہائی وے اتھارٹی اور دیگر متعلقہ شعبوں کی جانب سے لینڈ سلائیڈنگ سے بند کوہالہ۔ مظفر آباد روڈ (ایس ٹو) کی بحالی کا کام رات گئے تک جاری ہے تاہم پھنسی ہوئی مسافر بس کو نکال لیا گیا ہے ۔ترجمان نیشنل ہائی وے اتھارٹی کی طرف سے جاری بیان کے مطابق ڈولئی کے مقام پر بھاری لینڈ سلائیڈنگ کے باعث ٹریفک ک لئے یہ شاہراہِ فی الحال بند ہے۔ این ایچ اے اور متعلقہ ایمرجنسی اداروں کی کوششوں سے روڈ پر پھنسی مسافر بس کو بحفاظت نکال لیا گیا ہے –
این ایچ اے کا عملہ اور بھاری مشینری ملبے کو ہٹانے میں تاحال مصروف عمل ہے۔ ترجمان نے کہا کہ سٹریٹجک روڈ (کوہالہ۔ مظفر آباد) پر ٹریفک بحالی کے لئے مزید وقت درکار ہو گا۔ ترجمان نے کہا کہ متعلقہ این ایچ اے حکام کے مطابق شب بھر ملبہ ہٹانے کے بعد صبح شاہراہ کو ٹریفک کے لئے کھولا جائے گا۔
عوام سے التماس ہے کہ کوہالہ۔ مظفرآباد شاہراہ پر سفر سے فی الحال گریز کریں۔ شاہراہ کو ٹریفک کے لئے بحال ہونے پر عوام کو میڈیا کے ذریعے مطلع کر دیا جائے گا۔
