وزیراعظم محمد شہباز شریف سے تاجکستان کے سفیر شریف زادہ یوسف طائر کی ملاقات،دوطرفہ تعاون کے فروغ بارے تبادلہ خیال کیا

اسلام آباد۔(نمائندہ خصوصی ):وزیراعظم محمد شہباز شریف سے تاجکستان کے سفیر شریف زادہ یوسف طائر نے جمعے کو وزیر اعظم ہائوس میں ملاقات کی، اس موقع پر وزیراعظم نے تاجک سفیر کا خیرمقدم کرتے ہوئے پاکستان میں ان کی تعیناتی کی مدت کی کامیابی اور نیک خواہشات کا اظہار کیا۔پی ایم آفس کے میڈیا ونگ سے جاری پریس ریلیز کے مطابق ملاقات کے دوران رواں ماہ دوشنبہ کے اپنے حالیہ دورے کا ذکر کرتے ہوئے وزیراعظم نے کہا کہ وہ تاجک صدر امام علی رحمنٰ کے پرتپاک خیرمقدم سے بے حد متاثر ہوئے اور دورے کے دوران دونوں رہنمائوں کے درمیان نتیجہ خیز بات چیت ہوئی۔اپنے دورے کے دوران دونوں ممالک کے درمیان طے پانے والی مفاہمتی یادداشتوں/معاہدوں پر اطمینان کا اظہار کرتے ہوئے وزیراعظم نے زور دیا کہ ان پر بروقت عمل درآمد سے دوطرفہ تعلقات کو مزید مضبوط بنانے میں مدد ملے گی۔وزیراعظم نے صدر رحمٰن کو جلد از جلد پاکستان کا سرکاری دورہ کرنے کی دعوت کو دہراتے ہوئے کہا کہ پاکستان اس سال اکتوبر میں اسلام آباد میں ہونے والے شنگھائی تعاون تنظیم کے سربراہان حکومت کے اجلاس میں تاجکستان کی شرکت کا منتظر ہے۔تاجک سفیر نے وزیراعظم کو تعلیم، زراعت اور دفاع سمیت مختلف شعبوں میں دوطرفہ تعاون کے فروغ اور زمینی و فضائی راستوں کے ذریعے روابط کو بڑھانے کے حوالے سے تجاویز پیش کیں۔وزیراعظم نے متعلقہ حکام کو تاجک سفیر سے رابطہ کرکے ان تجاویز پر عملدرآمد کےلئے لائحہ عمل مرتب کرنے کی ہدایت کی۔ ملاقات میں کاسا-1000 سمیت علاقائی روابط کے دیگر منصوبے بھی زیر بحث آئے۔تاجک سفیر نے وزیراعظم کے استقبال پر ان کا شکریہ ادا کیا ، انہیں تاجک صدر کی جانب سے مبارکباد پیش کی اور پاکستان کے ساتھ اپنے تعلقات کو مزید فروغ دینے کی خواہش کا اظہار کیا۔