صدر آصف علی زرداری کی شہید کیپٹن محمد اسامہ بن ارشد کے گھر آمد، والد سے اظہار افسوس کیا

راولپنڈی: (نمائندہ خصوصی ):صدر مملکت آصف علی زرداری نے شہید کیپٹن محمد اسامہ بن ارشد کے گھر جاکر شہید کیپٹن کے والد سے اظہار افسوس کیا۔ایوان صدر پریس ونگ سے جاری بیان کے مطابق صدر مملکت نے شہید کے اہل خانہ سے اظہار ہمدردی اور شہید کے درجات کی بلندی کے لئے فاتحہ خوانی کی۔ محمد اسامہ بن ارشد گزشتہ دنوں شمالی وزیرستان میں دہشت گردوں کے ساتھ فائرنگ کے تبادلے میں شہید ہوئے تھے۔صدر مملکت نے شہید کی بہادری، جذبہ حب الوطنی اور وطن کیلئے خدمات کو بھی سراہا۔صدر مملکت نے وطن کیلئے جان کا نذرانہ پیش کرنے پر شہید کو خراج عقیدت پیش کیا۔صدر مملکت نےشہید کیلئے بلندی درجات ، اہل خانہ کیلئے صبر جمیل کی دعا کی۔