کوئٹہ۔: (نمائندہ خصوصی ):وزیراعظم محمد شہباز شریف نے بلوچستان کی صوبائی حکومت پر زور دیا ہے کہ مشاورت سے مسائل کی نشاندہی کرے اور ان کے حل کیلئے جامع منصوبہ بندی بنائے۔ وزیراعظم آفس کے میڈیا ونگ کی طرف سے جاری بیان کے مطابق پیر کو گورنر ہائوس کوئٹہ میں مسلم لیگ ن کے ارکان پارلیمان کے وفد سے ملاقات کے دوران گفتگو کرتے ہوئے وزیراعظم نے
کہا کہ بلوچستان سے منتخب نمائندے صوبے کی ترقی کیلئے اپنا کردار ادا کریں۔انہوں نے کہا کہ بلوچستان میں صوبائی اتحادی حکومت مشاورت سے مسائل کی نشاندہی کرے اور ان کے حل کیلئے جامع منصوبہ بندی بنائے۔ وزیراعظم نے کہا کہ مسلم لیگ ن عوامی خدمت پر یقین رکھتی ہے، پارٹی کے منتخب نمائندے عوامی فلاح و بہبود پر توجہ مرکوز کریں اور گورنر و وزیراعلیٰ بلوچستان سے مشاورت سے حلقوں میں ترقیاتی منصوبوں کی تکمیل اور درپیش مسائل حل کرنے کیلئے اقدامات کریں۔ ملاقات میں بلوچستان سے تعلق رکھنے والے مسلم لیگ ن کے ارکان پارلیمان کے ساتھ ساتھ وفاقی وزراء جام کمال خان، اعظم نذیر تارڑ، گورنر بلوچستان جعفر خان مندوخیل اور پارٹی عہدیداران بھی موجود تھے ۔
