اسلام آباد۔(نمائندہ خصوصی ):چیئرمین سینیٹ سید یوسف رضا گیلانی نے کہا ہے کہ چین پاکستان اقتصادی راہداری (سی پیک) نہ صرف سرمایہ کاری بلکہ ٹیکنالوجی کی منتقلی، ہنرمندی کی ترقی اور دونوں دوست ممالک کے درمیان معلومات کے تبادلہ کا محرک بن چکی ہے۔ان خیالات کا اظہار انہوں نے پاکستان انسٹی ٹیوٹ فار پارلیمانی سروسز (پی آئی پی ایس) ہال میں چائنا چیمبر آف کامرس ان پاکستان (سی پی کے) اور پالیسی ادارہ برائے پائیدار ترقی (ایس ڈی پی آئی) کی ”پائیدار ترقیاتی رپورٹ 2023 “کے اجراءکی تقریب سے خطاب کرتے ہوئے کیا۔رپورٹ کی رونمائی چیئرمین سینیٹ سید یوسف رضا گیلانی، وزیراعظم کی کوآرڈینیٹر برائے موسمیاتی تبدیلی رومینہ خورشید عالم، چیئرمین سی پی کے وانگ ہوئی ہوا اور چینی وزیر کونسلر یانگ گوانگ یوآن نے کی۔سید یوسف رضا گیلانی نے کہا کہ پاکستان نے بہت سے آزمائشی ادوار کا سامنا کیا ہے جبکہ اس دوران پاکستان کے عوام نے صبر اور استقامت سے ان چیلنجوں کا مقابلہ کیا ہے۔ انہوں نے کہا کہ پاکستان میں سی پیک ایک غیر جانبدارانہ ایجنڈا ہے 
کیونکہ پاکستان کی سب جماعتیں اس کی حمایت کرتی ہیں۔انہوں نے کہا کہ پاکستان پیپلز پارٹی (پی پی پی) صدر آصف علی زرداری کی قیادت میں پہلی جماعت تھی جس نے سی پیک کے آغاز کی راہ ہموار کی۔ انہوں نے کہا کہ حکومت پاکستان چینی کمپنیوں اور سی پیک کے تحت مختلف منصوبوں پر کام کرنے والے افراد کو درپیش چیلنجز سے آگاہ ہے اور چینی شہریوں کے لئے فول پروف سکیورٹی کو یقینی بنا رہی ہے۔انہوں نے بتایا کہ حکومت اور بیوروکریسی نے سی پیک کے دوسرے مرحلے یا سی پیک 2.0 کے تحت مختلف منصوبوں کو تیز کرنے کے لئے خصوصی سرمایہ کاری سہولت کونسل (ایس آئی ایف سی) جیسے ادارے تیار کئے ہیں۔انہوں نے کہا کہ سی پیک نے پاکستان میں مقامی لوگوں کے لئے 155000 ہنرمند اور غیر ہنرمند ملازمتیں پیدا کی ہیں تاہم سی پیک کے دوسرے مرحلہ کے لئے مفاہمت کی یادداشت پر عملدرآمد صنعتی ترقی، گرین انرجی اقدامات، کم کاربن کی ترقی اور دیگر شعبوں میں مسلسل تعاون کی عکاسی کرتا ہے۔انہوں نے کہا کہ سی پیک 2.0 صنعت کاری، پائیداری اور شمولیت پر نئی توجہ مرکوز کرنے اور اس پر عمل درآمد کرے گا۔ انہوں نے کہا کہ پاکستان نے چین کے صدر شی جن پنگ کی جانب سے سی پیک کو ماحول دوست بنانے کے لئے ایک ارب ڈالر کی فنڈنگ کے عزم کو سراہا ہے۔ پاکستان اور چین دونوں نے گرین بانڈز، رعایتی فنانسنگ اور قابل تجدید توانائی کی منتقلی کے لئے پرعزم اہداف مقرر کئے ہیں۔انہوں نے زور دیا کہ چین ان فنانسنگ ٹولز تک رسائی کو بہتر بنانے کا حل تلاش کرے اور تمام معاشی لین دین امریکی ڈالر کے بجائے چینی آر ایم بی میں شروع کرے۔چیئرمین سینیٹ نے اس بات پر بھی زور دیا کہ سی پیک کے تحت ترقیاتی منتقلی میں دولت پیدا کرنے اور انسانی ترقی کو ترجیح دی جانی چاہئے جبکہ پبلک پرائیویٹ پارٹنرشپ کو فروغ دینے سے اس اہم مقصد کے حصول میں مدد مل سکتی ہے۔چینی وزیر کونسلر یانگ گوانگ یوآن نے اس موقع پر کہا کہ چین پاکستان کے روشن مستقبل کے بارے میں پراعتماد ہے۔ انہوں نے کہا کہ نئی حکومت کے آپریشنل ہونے کے تین ماہ کے اندر تمام معاشی اشاریوں میں نمایاں بہتری آئی ہے۔ انہوں نے مزید کہا کہ سالانہ افراط زر کی شرح کم ہو کر 18 فیصد رہ گئی ہے جو دو سال کی کم ترین سطح ہے جبکہ آئی ٹی برآمدات میں بھی62 فیصد اضافہ ہوا ہے۔ سی پیک دوسرے مرحلے میں داخل ہو چکا ہے۔ اپنے وژن کو حقیقت میں تبدیل کرنے کے لئے، ہمیں نئے خیالات، نئے نقطہ نظر کی ضرورت ہے۔وفاقی وزیر منصوبہ بندی، ترقی و خصوصی اقدامات پروفیسر ڈاکٹر احسن اقبال نے کہا کہ سی پیک مشترکہ خوشحالی کا وژن ہے جس کا خواب پاکستان اور چین کی قیادت نے دیکھا ہے۔انہوں نے کہا کہ سی پیک کا دوسرا مرحلہ نہ صرف ملک بلکہ خطے میں مزید خوشحالی اور ترقی لائے گا۔اس موقع پر وزیراعظم کی کوآرڈینیٹر برائے موسمیاتی تبدیلی اور ماحولیاتی رابطہ رومینہ خورشید عالم نے کہا کہ سی پیک ون بیلٹ اینڈ روڈ انیشی ایٹو (بی آر آئی) کا سٹریٹجک مظہر ہے جبکہ اس کے نتیجے میں دنیا بھر میں ترقی کو یقینی بنانے کے خاطر خواہ نتائج برآمد ہوئے ہیں ۔ چیئرمین سی سی سی پی کے، وانگ ہوئی ہوا نے اپنے افتتاحی کلمات میں چیمبر کی جانب سے جاری کردہ تیسری پائیدار ترقیاتی رپورٹ میں شراکت داروں اور شراکت داروں کا شکریہ ادا کیا۔انہوں نے کہا کہ چین نے سی پیک کے دوران پاکستان میں پائیدار ترقی پر سختی سے عمل کیا ہے جس میں مقامی آبادیوں کی ترقی پر توجہ دی گئی ہے۔انہوں نے کہا کہ سی پیک فیز منصوبوں کی تکمیل اور گوادر بندرگاہ کی ترقی باہمی فائدے کی کوششوں کے لئے چین کے عزم کا ثبوت ہے۔ایس ڈی پی آئی کے توانائی اور اقتصادی امور کے ماہر ڈاکٹر خالد ولید نے اپنے استقبالیہ کلمات میں بتایا کہ ایس ڈی پی آئی مزید علاقائی روابط پر کام کر رہا ہے اور اس کے پاس چائنا اسٹڈی سینٹر اور گرین سی پیک الائنس ہے جہاں پاکستان چائنا انسٹی ٹیوٹ (پی سی آئی)، پریڈ اور دیگر سی پی کے کی مدد سے سی پیک 2.0 کے تحت بی ٹو بی اور جی ٹو جی انتظامات کو فروغ دینے پر کام کر رہے ہیں۔ تقریب کے اختتام پر چینی حکام کی جانب سے معززین کو یادگاری تحائف بھی پیش کئے گئے۔
سی پیک سرمایہ کاری ، ٹیکنالوجی کی منتقلی اور ہنرمندی کی ترقی کا محرک بن کر ابھرا ، پاکستان پیپلز پارٹی نے صدر آصف علی زرداری کی قیادت میں سی پیک کے آغاز کی راہ ہموار کی، سید یوسف رضا گیلانی
