اسلام آباد(نمائندہ خصوصی ):آکسفورڈ یونین کے نومنتخب صدر اور پاکستانی طالب علم اسرار خان نے منتخب ہونے پر وزیر اعظم شہباز شریف کے تہنیتی کلمات پر ان کا شکریہ ادا کیا ہے ۔ اسرار خان تیسرے پاکستانی اور صوبہ بلوچستان سے پہلے طالب علم ہیں جو اس عہدے پر فائز ہوئے ۔اسرار خان نے بھی وزیراعظم کو اپنی مدت کے دوران آکسفورڈ یونین کے دورے کی دعوت دی۔پیر کو سماجی رابطے کی ویب سائٹ ایکس پر وزیر اعظم کے پیغام کے جواب میں اسرار خان نے کہا کہ وزیر اعظم شہباز شریف آپ 
کے پرخلوص کلمات کے لیے شکریہ اداکرتا ہوں ۔ پاکستان کی نمائندگی کرنا اعزاز کی بات ہے۔ مجھے اپنی مدت کے دوران آکسفورڈ یونین میں آپ کی میزبانی کرتے ہوئے خوشی ہوگی۔انہو ں نے شہباز شریف کی بطور وزیراعلیٰ پنجاب شاندار اقدامات کو اجاگر کرتے ہوئے وزیراعظم سے پسماندہ پس منظر سے تعلق رکھنے والے طلباء کے لیے آکسفورڈ میں سکالرشپ سکیم کے قیام میں تعاون اور پاکستان میں طلبہ یونینز کی بحالی پر غور کرنے کی درخواست کی ۔ یہ نہ صرف طلباء کو یونیورسٹی کے 
معاملات میں آواز اٹھانے کے لیے ضروری ہے بلکہ بات چیت، بقائے باہمی اور اختلاف رائے کے احترام پر مبنی جمہوری کلچر کو فروغ دینے کے لیے بھی ضروری ہے۔اسرار خان ہیلری ٹرم 2025 کے لیے آکسفورڈ یونین کے صدر منتخب ہوئے ہیں۔اسرار خان کا تعلق صوبہ بلوچستان سے ہے، وہ ریجنٹ پارک کالج میں قانون میں ڈی فل کر رہے ہیں اور یونین کے چیف آف اسٹاف کے طور پر خدمات انجام دے چکے ہیں۔
