کوئٹہ: 9 روز قبل ملنے والی بوری بند لاش کا معمہ حل :بیوی نے دو ساتھیوں کیساتھ مل کر شوہر کو قتل کیا، قاتل گرفتار

کوئٹہ( نمائندہ خصوصی ) سیٹلائٹ ٹاؤن چالو باوڑی نالے کے قریب سے 9 روز قبل ملنے والی بوری بند لاش کا معمہ حل ہوگیا، بیوی نے دو ساتھیوں کے ساتھ مل کر شوہر کو قتل کیا، سیریس کرائم انوسٹی گیشن ونگ نے تینوں ملزمان کو گرفتار کرکے آلہ قتل اور واردت میں استعمال ہونے والی موٹرسائیکل قبضے میں لے لی۔ ذرائع کے مطابق 25 مئی کو سیٹلائٹ ٹاؤن پولیس کو چالو باوڑی نالے کے قریب سے بوری بند لاش ملی تھی، جس کا مقدمہ درج کرنے کے بعد کیس سیریس کرائم انوسٹی گیشن ونگ منتقل کردیا گیا تھا۔ ایس ایس پی سیریس کرائم انوسٹی گیشن ونگ کپیٹن (ر) زوہیب محسن کی سربراہی میں ٹیم نے اندھے قتل کی تحقیقات کا آغاز کیا اور مقتول کی بیوی کا موبائل فون تحویل میں لے کر جدید ٹیکنالوجی کا استعمال کرتے ہوئے قتل میں ملوث دو ملزمان نصیب اللہ اور ندا محمد کا سراغ لگا کر ٹیم نے سیٹلائٹ ٹاؤن سے گرفتار کرلیا۔ ذرائع نے بتایا کہ گرفتار ملزمان نے دوران تفتیش انکشاف کیا کہ مقتول کو اسی کی بیوی زرغونہ کے ساتھ مل کر اسی کے گھر میں قتل کیا اور لاش کو بوری میں بند کرکے گھر میں ہی رکھ دی اور رات ہونے کا انتظار کیا جب رات ہوئی تو موٹرسائیکل پر لے جا کر بوری چالو باوڑی نالے کے قریب رکھ کر فرار ہوگئے۔ ذرائع نے بتایا کہ قتل کی وجوہات بتاتے ہوئے ملزمان نے بتایا کہ ہم دونوں کا مقتول کی بیوی کے ساتھ ناجائز تعلقات تھے جس کا علم مقتول کو ہوگیا، اس کی بیوی کے ساتھ مل کر پہلے مقتول کو چرس کے کیس میں گرفتار کرانے کا منصوبہ بنایا لیکن اس منصوبے پر عمل نہ کرسکے، پھر اسے قتل کرنے کا منصوبہ تیار کیا اور 25 مئی کو جب مقتول اپنے گھر پر تھا تو اس کی بیوی نے فون کرکے ہمیں بلایا اور منصوبے کے تحت عبدالخالق کو قابو کرکے ٹوکے اور کلپ کے وار کرکے اسے قتل کر دیا۔ اس کی بیوی نے پلاسٹک کی بوری دی جس میں لاش کو ڈال کر گھر ہی میں رکھا تھا۔ ذرائع نے بتایا کہ ملزمان کے انکشاف پر سیریس کرائم انوسٹی گیشن ٹیم نے مقتول کی بیوی ملزمہ زرغونہ کو بھی گزشتہ روز گرفتار کرکے مزید تفتیش شروع کردی جبکہ آلہ قتل ٹوکا ٗ دو کلپ اور واردات میں استعمال ہونے والی موٹرسائیکل اور دس ہزار کی نقدی قبضے میں لے لی۔