اسلام آباد۔: (نمائندہ خصوصی ):وزیر مملکت برائے آئی ٹی و ٹیلی کمیونیکیشن شزہ فاطمہ خواجہ نے کہا آئی ٹی سیکٹر کی ترقی موجودہ حکومت کی پہلی ترجیح ہے، پاک قطر گروپ کی طرف سے پاکستان کے آئی ٹی انفراسٹرکچر کی ترقی میں اس سرمایہ کاری کا خیر مقدم کرتے ہیں۔وزیر مملکت برائے آئی ٹی جمعرات کو یہاں پاک قطر آئی ٹی ٹاور کی افتتاحی تقریب سے خطاب کر رہی تھیں۔انہوں نے کہا ٹیکنالوجی کے اس دور میں نوجوانوں کے لئے بہت زیادہ مواقع موجود ہیں، وزیراعظم پاکستان کے نیشنل ڈیجیٹلائزیشن پلان کے تحت اکانومی، گورننس، سوسائٹی کو ڈیجیٹلائز کر رہے ہیں، ڈیجیٹلائزیشن کی وجہ سے سسٹم
میں شفافیت ہو گی۔انہوں نے کہا کہ ملک میں بہتر آئی ٹی و ٹیلی کام انفراسٹرکچر اور کینکٹوٹی کے لئے کوششیں جاری ہیں۔ شزہ فاطمہ نے کہا کہ قطر کے ساتھ پاکستان کے برادرانہ تعلقات ہیں، یہ خوش آئند ہے کہ قطر کی سرمایہ کاری آئی ٹی سیکٹر کی طرف آ رہی ہے، ملک میں بیرونی سرمایہ کاری کی ضرورت ہے، پاکستان میں بیرونی سرمایہ کاری کے لئے ماحول سازگار ہے۔دریں اثناء مارس بی پی او کے افتتاح کے موقع پر وزیر مملکت برائے آئی ٹی شزہ فاطمہ خواجہ نے کہا کہ بی پی او سیکٹر میں بہت زیادہ پوٹینشل ہے، پاکستان کی ہنرمند ورک فورس کے لئے بی پی او سیکٹر نے بہت زیادہ جابز کے مواقع پیدا کئے ، حکومت بی پی او سیکٹر کی ترقی کے لئے کوشاں ہے۔انہوں نے کہا کہ وزارت آئی ٹی وزیراعظم شہباز شریف کے ویژن کے تحت کام کر رہی ہے۔
