اسلام آباد۔: (نمائندہ خصوصی )نائب وزیر اعظم اور وزیر خارجہ محمد اسحاق ڈار نے آج بنجول، گیمبیا میں 15ویں او آئی سی اسلامی سربراہی اجلاس کے موقع پرقطر کے وزیر اعظم اور وزیر خارجہ شیخ محمد بن عبدالرحمن الثانی سے ملاقات کی جس میں دونوں رہنمائوں نے کثیر الجہتی دوطرفہ تعاون بالخصوص توانائی کے شعبے میں تعاون پر تبادلہ خیال کیا۔دفتر خارجہ کی طرف سے ہفتہ کو جاری بیان کے مطابق نائب وزیر اعظم اور وزیر خارجہ محمد اسحاق ڈار نے وزیر اعظم اور قطر کے وزیر خارجہ شیخ محمد بن عبدالرحمن الثانی سے ملاقات کے دوران تجارتی اور سرمایہ کاری کے تعلقات کو مزید وسعت دینے اور قطر میں پاکستانیوں کے لیے روزگار کے بڑھتے ہوئے مواقع تلاش کرنے پر اتفاق کیا۔ حالیہ علاقائی اور عالمی پیش رفتوں بالخصوص مشرق وسطی میں ہونے والی پیش رفت پر بھی تبادلہ خیال کیا گیا۔ دونوں رہنمائوں نے فلسطینی عوام کے ساتھ یکجہتی کا اظہار کیا اور غزہ میں فوری جنگ بندی اور غزہ کے لوگوں کے لیے انسانی امداد کی بلا تعطل ترسیل پر زور دیا۔
