پشاور (نمائندہ خصوصی) محکمہ انسداد دہشت گردی خیبر پختونخوا نے سال 2024 کی مطلوب دہشتگردوں کی فہرست تیارکرلی ہے ۔ انتہائی مطلوب دہشت گردوں میں رواں سال 11 دہشتگردوں کے نام اور تصاویر شامل کیےگئےہیں۔ مطلوب دہشت گردوں کی فہرست میں لکی مروت سے 5 ، بنوں سے 4 ، شانگلہ 1 اور سین تنگہ جانی خیل سے ایک انتہائی مطلوب دہشت گردوں کی تفصیلات بتائی گئی ہے۔محکمہ انسداد دہشت گردی خیبر پختونخوا نے مطلوب 11 دہشتگردوں کے سروں کی قیمت ایک کروڑ 31 لاکھ روپے مقرر کی ہے۔ سی ٹی ڈی کی مطلوب افراد کی فہرست میں شامل لکی مروت کے دہشتگرد حبیب اللہ عرف سیف اللہ کے سر قیمت 50 لاکھ روپے مقرر کی گئی ہے۔بنوں سے تعلق رکھنے والے دہشت گرد محمد جمیل کے سر کی قیمت 30 لاکھ روپے مقرر کی گئی ہے۔لکی مروت کے محمد گل عرف ساکی کے سر کی قیمت 10 لاکھ روپے مقرر کی ہے جبکہ بنوں سے تعلق رکھنے والے رابد اللہ عرف چگ کے سر کی قیمت 10 لاکھ مقرر ہے۔سی ٹی ڈی نے گزشتہ سال مطلوب دہشت گردوں کی 3 فہرستیں جاری کی تھی جس میں 294 مطلوب دہشت گردوں کی سروں کی قیمتیں مقرر کی گئی تھی۔ خیبر پختونخوا سی ٹی ڈی نے اب تک 305 مطلوب دہشت گردوں کےسروں کی قیمت مقرر کی ہے۔ سی ٹی ڈی ذرائع کے مطابق حالیہ حملوں میں ملوث دہشت گردوں کو مطلوب افراد کی فہرست میں شامل کیا گیابے۔
