ڈاکٹر عافیہ کی رہائی کیلئے ڈاکٹر فوزیہ صدیقی کے مختلف شہروں کے دورے اوراہم شخصیات سے ملاقاتیں

کراچی (نمائندہ خصوصی ) قوم کی بیٹی ڈاکٹر عافیہ کی امریکی قیدناحق سے رہائی اور وطن واپسی کے لیے جاری جدوجہد کے سلسلے میں ان کی ہمشیرہ اور گلوبل عافیہ موومنٹ کی چیئرپرسن ڈاکٹر فوزیہ صدیقی مختلف شہروں کے دورے اور شخصیات سے ملاقاتیں کررہی ہیں۔گزشتہ روز انہوں نے مسلم طلباءمحاذ پاکستان کی دعوت پر اسلام آباد میں منعقد ہونے والی ”فلسطین یوتھ کانفرنس“ میں شرکت کی اور اس قبل انہوں نے پشاور میں خیبر پختونخوا کے گورنر حاجی غلام علی سے گورنر ہاﺅس میں ملاقات کی۔ اس موقع پر انہوں نے ڈاکٹر عافیہ کی رہائی کے لیے کی جانے والی کوششوں کی تفصیلات سے خیبر پختونخوا کے گورنر حاجی غلام علی کو آگاہ کیا۔ واضح رہے کہ ڈاکٹر عافیہ کیس کے امریکی وکیل کلائیو اسٹافورڈ اسمتھ کا کہنا ہے کہ سال 2024 ءڈاکٹر عافیہ کی رہائی کے حوالے سے انتہائی اہمیت کا حامل ہے۔ ان کا کہنا ہے کہ ڈاکٹر عافیہ کی رہائی اس سال کے اختتام تک ممکن بنائی جا سکتی ہے مگر اس کے لیے انہیں حکومت پاکستان ، سول سوسائٹی اور پاکستان کے عوام کی مدد اور حمایت درکار ہے۔