انجمن اساتذہ جامعہ کراچی کی جانب سے کراچی یونیورسٹی ایمپلایز ویلفیئر ایسوسی ایشن کی حمایت کا اعلان

 کراچی(نمائندہ خصوصی) جامعہ کراچی کا انتظامی و مالی بحران بڑھتا چلا جارہا ہے اور ہر گزرتا دن جامعہ کو تباہی کے دہانے کے قریب کررہا ہے۔ ان حالات میں آج ایمپلایز ویلفیئر ایسوسی ایشن کا تاریخی اجلاس منعقد ہوا جس میں جامعہ کے بڑھتے ہوئے مالی و انتظامی بحران پر شدید تحفظات کا اظہار کرتے ہوئے ملازمین کے بنیادی مالی حقوق کی عدم ادائیگی پر مورخہ 29 اپریل بروز پیر سے تمام انتظامی امور کی ادائیگی کے بائیکاٹ فیصلہ کیا گیا ہےیہ بات سب کے علم میں ہے کہ انجمن اساتذہ گذشتہ پیر سے شام کی تدریس کا انتہائی کامیابی سے بائیکاٹ جاری رکھے ہوئے ہے اور مطالبات پورا نا ہونے پہ بائیکاٹ کے دائرہ کو وسیع کرنے کا بھی سوچا جا رہا ہے۔ لہذا اس صورتحال میں انجمن اساتذہ یہ سمجھتی ہے کہ ایمپلائر ایسوسی ایشن کی جانب سے انتظامی امور کا بائیکاٹ درست سمت میں ایک قدم ہے۔ جامعہ کے تمام اسٹیک ہولڈرز کو اس وقت یک زبان ہو کر اپنے جائز حقوق کے لیے ساتھ کھڑے ہونے کی ضرورت ہے۔ لہذا انجمن اساتذہ اس بائیکاٹ کا نا صرف خیر مقدم کرتی ہے بلکہ مکمل حمایت کا یقین بھی دلاتی ہے۔ انجمن اساتذہ امید کرتی ہے کہ ارباب اختیار جامعہ کے بڑھتے ہوئے سنگین مالی بحران کا فوری نوٹس لیتے ہوئے جامعہ کے تمام ملازمین و اساتذہ کے جائز حقوق کی ادائیگی کو ممکن بنائیں گے۔ انجمن اساتذہ تمام اساتذہ و غیر تدریسی عملہ کو یقین دلاتی ہے کہ ملازمین جامعہ کے جائز حقوق کے حصول تک اس جدوجہد میں انجمن اساتذہ آپ کے شانہ بشانہ کھڑی رہے گی۔