کراچی(نمائندہ خصوصی )
شہر قائد میں گرج چمک کے ساتھ موسلادھار بارش اور متوقع آندھی کا امکان ہے، جناح انٹرنیشنل ائیرپورٹ پر سی اے اے نے پیشگی اقدامات کے لیے احکامات جاری کردیے
سول ایوی ایشن اتھارٹی سی اے اے کے شعبہ ایئرسائیڈ نے متعلقہ اداروں کو الرٹ کردیا، ہلکے وزن کے ہوائی جہازوں کو محفوظ مقامات پر منتقل کیا جائے۔رن ویز اور ٹارمک ایریامیں کسی بھی تصادم کے خدشے کا باعث بننے والے آلات کو بھی حساس مقامات سے ہٹادیا جائے۔ گرج چمک کے ساتھ بارش اورآندھی کے دوران مختلف قسم کے کیڑے مکوڑوں کے خاتمے کے لیے اسپرے کویقینی بنایا جائے۔
جہازوں سے پرندوں کو دور رکھنے کے لیےاضافی برڈ شوٹرز تعینات کیے جائیں، ائرفیلڈ لائٹنگ پارٹی اس بات کو یقینی بنائیں کہ الیکٹریکل کیبل کے جوڑدرست ہیں اورگڑھے ڈھکے ہوئے ہیں۔
بارش کے دوران محفوظ آپریشن کے لیے رن وے کی رگڑ/ بریکنگ ایکشن کا تعین کرنے کے لیے ٹیم تیار رکھا جائے، بین الاقوامی اور ملکی سیٹلائٹ ایریا کے عقب میں بارش کے پانی کا بہاؤ ممکن بنایا جائے۔
رن ویز کے اطراف میں ہرقسم کے گڑھوں کو بھرنے کا کام فوری مکمل کیا جائے، فالومی وین کو ہنگامی حالات کے دوران مکمل متحرک رکھاجائے۔
