ملک بھر میں رواں سال ی پہلی پولیو مہم کا آغاز ہوگیا

اسلام آباد (نمائندہ خصوصی) ملک بھر میں مختلف دورانیے کی 5 سال سے کم عمر بچوں کو پولیو سے بچاﺅ کے قطرے پلانے کی انسداد پولیو مہم کا آغاز ہوگیا ہے۔محکمہ صحت کے ترجمان کے مطابق مہم کے دوران محکمہ صحت کی پولیو ٹیمیں ملک کے تمام 159 اضلاع میں گھر گھر جا کر بچوں کو پولیو سے بچاﺅ کے قطرے پلائیں گی۔صوبہ پنجاب میں ایک ہفتے تک جاری رہنے والی پولیو مہم کے دوران 2 کروڑ 25 لاکھ بچوں کو پولیو سے بچاﺅ کے قطرے پلائے جائیں گے، محکمہ صحت نے اس حوالے سے لاہور، فیصل آباد اور ملتان کو حساس ترین شہر قرار دیا ہے۔صوبہ سندھ میں 7 روزہ انسداد پولیو مہم 8 سے 14 جنوری تک جاری رہے گی، صوبے کے 30 اضلاع میں ایک کروڑ سے زائد بچوں کوپولیو وائرس سے بچاوکے قطرے پلائے جائیں گے۔پولیومہم پر سینتیس ہزار سے زائد ویکسی نیشن ٹیموں کی حفاظت پر 4 ہزار 225 سیکیورٹی اہلکار مامور ہوں گے۔نگراں وزیرصحت کا کہنا تھا کہ سندھ 28 مقامات سے حاصل کردہ ماحولیاتی نمونوں میں 11 میں پولیو وائرس پایاگیا۔گزشتہ برس کراچی کی یوسی گجرو ضلع شرقی کے دوبچوں میں پولیووائرس کی تصدیق ہوئی تھی،اس کے علاوہ بلوچستان میں ایک ہفتے تک جاری مہم کے دوران پانچ سال تک کی عمر کے 2.5 ملین سے زائد بچوں کو انسداد پولیو کے قطرے پلائے جائیں گے۔گلگت بلتستان میں 5 روزہ مہم کے دوران 2 لاکھ پچاس ہزار سے زائد بچوں کو قطرے پلائے جائیں گے۔