وزیر دفاع سے آذربائیجان کے سفیر کی ملاقات ،دوطرفہ تعلقات پر تبادلہ خیال

اسلام آبا د(نمائندہ خصوصی)وزیر دفاع لیفٹیننٹ جنرل (ریٹائرڈ) انور علی حیدر سے جمہوریہ آذربائیجان کے سفیر خضر فرہادوف نے یہاں راولپنڈی میں ان کے دفتر میں ملاقات کی۔وزیر نے معزز مہمان کا خیرمقدم کیا اور دونوں ممالک کے درمیان دوطرفہ برادرانہ تعلقات کی اہمیت کو اجاگر کیا جو تاریخی، ثقافتی اور مذہبی مشترکات پر مبنی ہیں۔ انہوں نے کہا کہ پاکستان آذربائیجان کو اپنے سٹریٹجک محل وقوع، بے پناہ وسائل، ترقی پسند نقطہ نظر اور تیزی سے بڑھتی ہوئی معیشت کی وجہ سے ایک اہم ملک کے طور پر دیکھتا ہے۔علاوہ ازیں وزیر دفاع نے کہا کہ حکومت پاکستان دونوں ممالک کے درمیان دفاعی تعلقات کو بڑھانے کا ارادہ رکھتی ہے۔ انہوں نے دونوں ممالک کی اعلیٰ عسکری اور دفاعی قیادت کے درمیان مسلسل رابطوں کو سراہا۔ وزیر دفاع نے دفاعی صنعت میں مشترکہ منصوبے کے ممکنہ شعبوں کی تلاش کے ذریعے دفاعی پیداوار کے شعبے میں تعاون بڑھانے کی خواہش کا اظہار کیا۔