اسلام آباد(نمائندہ خصوصی) نگران وزیراعظم انوار الحق کاکڑ نے کہا ہے کہ ہمارا فوکس نجکاری پر ہے، خسارے میں چلنے والے اداروں کی نجکاری پر غور کر رہے ہیں، پی آئی اے کی نجکاری پہلی ترجیح ہے۔ ہماری کوشش ہے سرمایہ کاری پاکستان لائی جا سکے، آئندہ کچھ روز میں پاکستان میں سرمایہ کاری کی خوشخبری ملے گی۔ نجی ٹی وی سے گفتگو کرتے ہوئے نگران وزیراعظم نے کہا کہ ہمیں مختلف چیلنجز کا سامنا ہے، ہنر نہ ہونے کی وجہ سے بھی بعض مسائل ہیں، نوجوانوں کو ہنر سکھانے کیلئے مختلف ٹریننگ پروگرام پر کام ہو رہا ہے، اگلے دس سال میں 10لاکھ نرسز کو تربیت دینے کا پروگرام ہے۔ان کا کہنا تھا کہ ہم نہ صرف خطے بلکہ خطے کے باہر سے بھی سرمایہ کاری پاکستان لانا چاہتے ہیں، پاکستان اور دیگر ممالک کے درمیان کچھ ایم او یوز پر دستخط ہوں گے، پاکستان میں آئندہ ہفتے سرمایہ کاری سے متعلق اچھی خبریں ملیں گی۔ انوار الحق کاکڑ نے کہا کہ ہمارا فوکس نجکاری پر ہے، خسارے میں چلنے والے اداروں کی نجکاری پر غور کر رہے ہیں، پی آئی اے کی نجکاری پہلی ترجیح ہے، اداروں سے ریونیو نہیں کما سکتے تو ملک ترقی نہیں کر سکتا، اس میں کوئی شک نہیں کہ پاکستان قدرتی وسائل سے مالا مال ہے، انسانی وسائل کی ترقی اور اصلاحات پر کام جاری ہے۔وزیراعظم کا کہنا تھا کہ ایس آئی ایف سی میں سول اور ملٹری قیادت کے لوگ ہیں، ایس آئی ایف سی کے ذریعے سرمایہ کاری پالیسی میں اصلاحات کی جا رہی ہیں، ہمیں اپنے سرمایہ کاروں کو ایس آئی ایف سی میں سرمایہ کاری کیلئے ویلکم کرنا چاہیے۔انہوں نے مزید کہا کہ حکومتی اخراجات میں کمی کیلئے مختلف لائحہ عمل وضع کئے گئے ہیں، جمہوریت میں مثبت رویے کے ساتھ سب کو اپنا کردار ادا کرنا ہوگا، پاکستان میں میڈیا آزاد اور خودمختار ہے، غزہ میں صورتحال کافی تشویشناک ہے۔ 
ہماری توجہ نجکاری پر ہے‘ جلد پاکستان میں سرمایہ کاری کی خوشخبری ملے گی، نگراں وزیراعظم
پی آئی اے کی نجکاری پہلی ترجیح ہے‘ ہماری کوشش ہے سرمایہ کاری پاکستان لائی جا سکے‘ ایس آئی ایف سی کے ذریعہ سرمایہ کاری پالیسی میں اصلاحات کی جارہی ہیں‘ انوار الحق کاکڑ حکومتی اخراجات میں کمی کیلئے مختلف لائحہ عمل وضع کئے گئے ہیں‘ ہم نہ صرف خطہ بلکہ خطہ کے باہر سے بھی سرمایہ کاری پاکستان لانا چاہتے ہیں، ہنر نہ ہونے کی وجہ سے بھی بعض مسائل ہیں، نجی ٹی وی سے گفتگو
