لاہور (مانیٹرنگ ڈیسک) سابق وزیراعلیٰ پنجاب پرویز الہٰی اور ان کے صاحبزادے مونس الہٰی کے خلاف منی لانڈرنگ کیس کی تحقیقات میں پیشرفت ہوئی ہے۔ وفاقی تحقیقاتی ادارے (ایف آئی اے) نے مونس الہٰی کی گرفتاری کےلیے انٹرپول سے رابطہ کرنے کا فیصلہ کرلیا۔ذرائع کا کہنا ہے کہ پرویز الہٰی اور مونس الہٰی کے تمام بینک اکاونٹس منجمد کردیے گئے ہیں۔مونس الہٰی اور پرویز الہٰی کے اہلِ خانہ کے بینک اکاونٹس بھی منجمد کردیے گئے ہیں۔ 
ایف آئی اے لاہور نے مونس الہٰی اور فیملی کے 100 سے زائد اکاونٹس منجمد کردیے۔ ذرائع نے بتایا کہ ان بینک اکاونٹس میں مبینہ کرپشن اور منی لانڈرنگ کا پیسہ جمع کروایا گیا۔ ذرائع کا یہ بھی کہنا ہے کہ ایف آئی اے نے مونس الہٰی کو عدالت سے اشتہاری قرار دلوانے کا فیصلہ کیا ہے، جبکہ مونس الہٰی کے ریڈ وارنٹ جاری کروانے کا بھی فیصلہ کیا گیا ہے۔ مونس الہٰی کا ریڈ وارنٹ جاری کروا کر انہیں انٹرپول کے ذریعے گرفتار کیا جائے گا۔
