مغربی کلچرکو فروغ دینے والےگماشتوں کامقابلہ جاری رہے گا.حق اور باطل کے معرکے میں حق والے ہی سرخرو ہوں گے۔ علامہ راشد محمود سومرو

کراچی (اسٹاف رپورٹر ) جمعیت علمائے اسلام صوبہ سندھ کے سیکریٹری جنرل علامہ راشد محمود سومرو نے کہا ہے کہ سندھ مسائل کی آماجگاہ بن چکا ہے آئے روز بڑھتی لاقانونیت کے باعث امن وامان کی صورتحال مخدوش ہوچکی ہے، بدامنی،اغوا برائےتاوان،ریکارڈ کرپشن نے عوام کا جینا دوبھر کردیا ہے،ان حالات سے چھٹکارے کیلئے ہمیں فیصلہ کن کردار ادا کرنا ہوگا۔ ان خیالات کا اظہار انہوں نے کراچی کے تمام اضلاع اور پی ایسز کے امراء و نظماء عمومی کے اجلاس اور ضلع غربی کراچی کے ورکرز کنونشن سے خطاب کرتے ہوئے کیا ۔اجلاس میں صوبائی نائب امیر مولانا عبدالکریم عابد،قاری محمد عثمان،مولانا محمدغیاث،ڈاکٹر نصیرالدین سواتی مولاناسمیع الحق سواتی ، مولانا امین اللہ ، مولاناحماد اللہ شاہ، شرف الدین اندھڑ، مولانافتح اللہ،مولانا نور الحق،مولانا احسان اللہ ٹکروی،مولانا زرین شاہ،سید اکبر شاہ ہاشمی،مفتی محمد خالد،قاری فیض الرحمن عابد،قاری نورالامین،فاروق سید حسن زئی، مولانا اجمل شیرازی، رئیس حبیب اندھڑ ودیگر بھی شریک ہوئے ۔اجلاس سے خطاب کرتے ہوئے علامہ راشد محمود سومرو کا کہنا تھا کہ جے یو آئی صوبے کی متبادل قیادت کےطورابھر کرآرہی ہے۔ ہم نےمغربی ایجنڈے کے بخیے ادھیڑ کر رکھ دیئے ہیں۔
انہوں نے کہا کہ ہم سندھ پر مسلط کالی بھیڑوں سے نجات دلانے کیلئے عوام کو جگانے کی مہم پر نکل چکے ہیں، سندھ کے عوام کواپنے حقوق کیلئے نکلنا ہوگا،22 اکتوبر سے 2 نومبر تک سندھ امن مارچ صوبے کے مستقبل کا تعین کرے گا، عوام سے اپیل ہے کہ وہ پندرہ برس سے صوبے پر مسلط کرپٹ حکمرانوں کا راستہ روکنے کیلئے جمعیت علمائے اسلام کا ساتھ دیں ۔