لاہور(نمائندہ خصوصی) سیکرٹری پاور راشد لنگڑیال نے اپنے ایک بیان میں دعویٰ کیا ہے کہ ملک بھر میں بجلی چوروں کے خلاف کارروائیوں کے دوران 14 ارب 33 کروڑ 30 لاکھ روپے سے زائد وصولیاں کر لی گئی ہیں۔ اپنے بیان میں انہوں نے بتایا کہ بجلی چوری کے خلاف مہم میں اب تک 10 ہزار افراد کو گرفتار جبکہ بجلی چوری کی 23 ہزار 152 ایف آئی آرز کا اندراج کیا گیا ہے۔ سیکرٹری پاور ڈویژن کے مطابق ریکوری میں لاہور الیکٹرک سپلائی کمپنی (لیسکو) 3 ارب 85 کروڑ 20 لاکھ روپے وصولیوں کے ساتھ سرفہرست ہے۔ انہوں نے بتایا کہ بجلی چوروں کے خلاف کارروائیوں میں حیدرآباد الیکٹرک سپلائی کمپنی (حیسکو) 2 ارب 69 کروڑ 40 لاکھ اور پشاور الیکٹرک سپلائی کمپنی (پیسکو) کی جانب سے 2 ارب 42 کروڑ کی وصولیاں کی گئی ہیں۔ سکھر الیکٹرک سپلائی کمپنی (سیپکو) نے 1 ارب 63 کروڑ اور ملتان الیکٹرک سپلائی کمپنی (میپکو) کی جانب سے 1 ارب 62 کروڑ 40 لاکھ روپے کی وصولیاں کی گئی ہیں۔ 
ملک بھر میں بجلی چوروں کےخلاف کریک ڈاون، 14 ارب 33 کروڑ روپے وصول
ریکوری میں لیسکو 3 ارب 85 کروڑ 20 لاکھ روپے وصولیوں کے ساتھ سرفہرست
