اسلام آباد( نمائندہ خصوصی )صحافی خالد جمیل کو اڈیالہ جیل سے رہا کردیا گیا۔زرائع ابلاغ کے مطابق متنازع ٹوئٹ کیس میں اسپیشل جج سینٹرل شاہ رخ ارجمند نے صحافی خالد جمیل کی ضمانت بعداز گرفتاری آج منظور کی تھی۔خالد جمیل کی پچاس ہزار روپے کے مچلکوں کے عوض ضمانت منظور کی گئی۔روبکار جمع ہونے کے بعد خالد جمیل کو اڈیالہ جیل سے رہائی مل گئی۔اسلام آباد میں صحافی خالد جمیل کو جوڈیشل ریمانڈ ختم ہونے پر اسپیشل جج سینٹرل کی عدالت میں پیش کیا گیا۔اس سے قبل سماعت کے دوران وکیلِ صفائی نوید ملک نے عدالت میں کہا کہ خالد جمیل مشہور صحافی ہیں اور صحافی کی ذمے داری سمجھتے ہیں، پیکا ایکٹ سیکشن 20 کو عدالت نے غیر آئینی قرار دیا جس کے تحت اب کارروائی نہیں ہو سکتی۔وکیلِ صفائی نوید ملک کا مزید کہنا تھا کہ اسلام آباد ہائی کورٹ کا فیصلہ نظر انداز کرتے ہوئے یہ مقدمہ درج کیا گیا۔دوسری جانب سماعت کے دوران پراسیکیوٹر کا عدالت میں کہنا تھا کہ خالد جمیل کی ٹوئٹس سے خاص بیانیہ بنایا جا رہا ہے، ایسے ٹوئٹس سے ملک کو نقصان پہنچتا ہے۔پراسیکیوٹر کا کہنا تھا کہ اعظم سواتی کیس سب کے سامنے ہے۔واضح رہے کہ صحافی خالد جمیل کو سائبر کرائم ایکٹ کے تحت درج مقدمے میں گرفتار کیا گیا تھا۔
