کینیڈا نے بھارت کا انتہاپسند مکروہ چہرہ بے نقاب کر دیا ہے ، مشعال ملک

ننکانہ صاحب(نمائندہ خصوصی )انسانی حقوق اور خواتین کو بااختیار بنانے کے بارے میں پاکستان کے نگراں وزیراعظم انوار الحق کاکڑ کی معاون خصوصی مشعال حسین ملک نے کہا ہے کہ کینیڈا نے بھارت کا انتہاپسند اور نسل پرست مکروہ چہرہ دنیا بھر میں بے نقاب کر دیا ہے ۔کشمیر میڈیا سروس کے مطابق مشعال ملک نے ننکانہ صاحب کے دورے کے دوران گفتگو کرتے ہوئے کہا کہ سکھ رہنما ہردیپ سنگھ ننجر کا کینیڈا میں قتل قابلِ مذمت ہے۔ انہوں نے کہا کہ بھارت میں خالصتان سمیت آزادی کی کئی تحریکیں چل رہی ہیں۔ اُنہوں نے کہا کہ بھارت آسٹریلیا اور یورپ میں بھی سکھ برادری کو ہراساں کررہا ہے۔مشعال حسین ملک نے کہا کہ جڑانوالہ میں پیش آنے والا افسوسناک واقعہ بھی بھارتی خفیہ ایجنسی را نے ترتیب دیا تھا۔انہوں نے کہا کہ بھارت پوری دنیا کا امن تباہ کرنا چاہتا ہے اور اس نے کشمیریوں کی زندگی اجیرن کر رکھی ہے۔اُنہوں نے کہا کہ مقبوضہ کشمیر میں انسانی حقوق کی بدترین خلاف ورزیاں ہو رہی ہیں ، بھارت میں کوئی بھی اقلیت محفوظ نہیں ہے ، اقلیتی برادریوں کی عبادت گاہوں کو تباہ کیا جا رہا ہے۔