اسلام آبا د(نمائندہ خصوصی)سابق وزیر اعلیٰ پنجاب چوہدری پرویز الٰہی کا 2 روزہ جسمانی ریمانڈکا تحریری حکم نامہ جاری کر دیا گیا ہے ،انسداد دہشت گردی عدالت کے ڈیوٹی جج نے تحریری حکم نامہ جاری کیا ہے جس کے مطابق ملزم پرویز الٰہی کو ضمنی بیان کی بنیاد پر مقدمے میں گرفتار کیا گیا ہے، حقائق جاننے کیلئے ملزم کو دو روزہ جسمانی ریمانڈ پر پولیس کے حوالے کیا جاتا ہے،پولیس ملزم پرویز الٰہی کا میڈیکل چیک اپ کرائے، پرویز الٰہی سابق ڈپٹی وزیر اعظم، سابق وزیر اعلیٰ پنجاب رہ چکے ہیں،پرویز الٰہی کی زائد عمری کے باعث انہیں گرفتاری کے دوران اچھے ماحول میں رکھا جائے، پرویز الٰہی کی صحت اور تکریم کو مدنظر رکھتے ہوئے انہیں اچھے ماحول میں رکھا جائے، پولیس پرویز الٰہی کو 8 ستمبر کو دوبارہ عدالت میں پیش کرے، پرویز الٰہی کی اہلیہ، بیٹے اور بیٹیوں کو ان سے ملاقات کی اجازت دی جاتی ہے، پرویز الٰہی کو گھر کا کھانا مہیا کرنے کی درخواست بھی منظور کی جاتی ہے،ایس ایچ او سی ٹی ڈی ملاقات اور گھر کا کھانا فراہم کرنے کے انتظامات کریں۔