عسکری ٹاور حملہ کیس،چیئرمین پی ٹی آئی کو شامل تفتیش کرنے کا فیصلہ

لاہور ( نمائندہ خصوصی) پاکستان تحریک انصاف کے سربراہ کو عسکری ٹاور حملہ کیس میں بھی شامل تفتیش کرنے کا فیصلہ کر لیا گیا۔ذرائع کے مطابق پولیس کی جوائنٹ انویسٹی گیشن ٹیم اٹک جیل میں سابق وزیراعظم کا بیان قلمبند کرنے کے لئے عدالت سے اجازت لے گی، عسکری ٹاور کیس کی تحقیقات کے لئے بنائی گئی جے آئی ٹی کی سربراہ ایس ایس پی انویسٹی گیشن لاہور ڈاکٹر انوش مسعود چودھری اور دیگر ممبران اٹک جائیں گے۔ذرائع کا کہنا ہے کہ 9 مئی کیس کے حوالے حکومت نے مختلف جے آئی ٹیز تشکیل دے رکھی ہیں، تھانہ سرور روڈ کیس کی جے آئی ٹی کے ہیڈ عمران کشور ہیں، عسکری ٹاور کیس کی جے آئی ٹی ہیڈ ڈاکٹر انوش مسعود چودھری ہیں۔ذرائع نے بتایا ہے کہ عدالت سے اجازت کے بعد جے آئی ٹی کے ممبران چیئرمین پی ٹی آئی کا بیان قلمبند کرنے اٹک جیل جائیں گے۔