سربراہ پاک فضائیہ ایئر چیف مارشل ظہیر احمد بابر سدھو نے آج نائیجیریا کے وزیر دفاع اور کمانڈر بحرین نیشنل گارڈ سے الگ الگ ملاقاتیں کیں- ان ملاقاتوں کے دوران پیشہ ورانہ اور باہمی دلچسپی کے امور پر تبادلہ خیال کیا۔
نائیجیرین وزیر دفاع میجر جنرل بشیر صالحی مگاشی (ریٹائرڈ) نے پیشہ ورانہ مہارت اور ایوی ایشن انڈسٹری میں خود انحصاری کی طرف گامزن پاک فضائیہ کی تعریف کی۔ ایئر چیف نے کہا کہ پاکستان اور نائیجیریا کے مابین دیرینہ مذہبی، ثقافتی اور تاریخی رشتہ قائم ہے جو دونوں فضائی افواج کے مابین مضبوط روابط کا مظہر ہے۔ انہوں نے جے ایف 17 تھنڈر لڑاکا طیاروں پر اعتماد کرنے پر نائجیریا کی حکومت اور عسکری قیادت کا شکریہ ادا کیا۔
سربراہ پاک فضائیہ نے کمانڈر بحرین نیشنل گارڈ جنرل شیخ محمد بن عیسیٰ بن سلمان الخلیفہ کے ساتھ ایک علیحدہ ملاقات میں کہا کہ پاکستان سلطنت بحرین کے ساتھ اپنے مضبوط سفارتی، اقتصادی اور دفاعی تعلقات کو قدر کی نگاہ سے دیکھتا ہے۔
معزز مہمان نے علاقائی استحکام میں پاکستان کے کردار کو سراہا۔ انہوں نے پاک فضائیہ کی پیشہ وارانہ مہارت کی بھی تعریف کی۔ انہوں نے پاکستان کے ساتھ ہر سطح پر سفارتی اور فوجی تعاون میں مزید بہتری کے لیے اپنا کردار ادا کرنے کی یقین دہانی کروائی۔ ملاقات میں دونوں برادر ممالک کے درمیان پیشہ وارانہ تعاون کو مزید فروغ دینے کے اقدامات پر بھی تبادلہ خیال کیا گیا۔
