نگراں وزیراعظم اور نگراں وزیراعلیٰ سندھ کے درمیان ون آن ون ملاقات

کراچی (نمائندہ خصوصی)نگراں وزیراعظم انوار الحق کاکڑ اور نگراں وزیراعلی سندھ جسٹس (ر)مقبول باقر کے درمیان وزیراعلیٰ ہاﺅس میں ون آن ون ملاقات ہوئی،جس میں حلقہ بندیوں اور انتخابات کے حوالے سے الیکشن کمیشن سے تعاون کا فیصلہ کیا گیا۔تفصیلات کے مطابق بدھ کونگراں وزیراعظم انوار الحق کاکڑوزیراعلی ہاﺅس پہنچے ،جہاں ان کانگراں وزیراعلی سندھ جسٹس (ر)مقبول باقر نے ان کا استقبال کیا۔دونوں رہنماﺅں کے درمیان ون آن ون ملاقات ہوئی۔ملاقات میں مذہبی ہم آہنگی کے لیے مل کر کام کرنے پر اتفاق کیا گیا جبکہ حلقہ بندیوں اور انتخابات کے انعقاد کے حوالے سے الیکشن کمیشن سے تعاون کرنے کا بھی فیصلہ کیا گیا اس کے علاوہ صوبے میں جاری ترقیاتی کاموں کو مکمل کرنے پر بھی اتفاق کیا گیا۔ترجمان وزیراعلی کے مطابق ملاقات میں صوبے میں بین المذہبی ہم آہنگی کیلیے اجلاس اور سیمینار کرانے پر اتفاق کیا گیا۔ ملاقات میں مجموعی امن وامان کی صورتحال پر گفتگو کی گئی اور نگراں وزیراعلی نے کچے میں ڈاکوﺅں کیخلاف آپریشن پر نگراں وزیراعظم کو آگاہ کیا۔ دونوں رہنماﺅں نے کراچی میں امن وامان خاص طور پر اسٹریٹ کرائم پر بھی گفتگو کی۔ترجمان کے مطابق ملاقات میں سیلاب متاثرین کی بحالی اور ان کے گھروں کی تعمیر کے منصوبے پر تبادلہ خیال کیا گیا جب کہ نگراں وزیراعلی جسٹس ریٹائرڈ مقبول باقر نے نگراں وزیراعظم کو کراچی کے نالوں کی متاثرین کی بحالی سے متعلق بھی آگاہ کیا۔اس موقع پر نگراں وزیراعظم انوار الحق کاکڑ نے سندھ میں سرمایہ کاری کے فروغ کے لیے نگراں صوبائی حکومت کو ہدایت کی اور کہا کہ کراچی میں بہترین امن وامان سے سرمایہ کاروں کا اعتماد بڑھے گا اور سرمایہ کاری میں اضافہ ہوگا۔