شہدا ہمارا فخر ہیں، مکمل امن و استحکام کی واپسی تک ان کی قربانیاں رائیگاں نہیں جائیں گی، آرمی چیف

راولپنڈی (نمائندہ خصوصی) پاک فوج کے سربراہ جنرل سید عاصم منیر نے کہاہے کہ شہدا ہمارا فخر ہیں اور پاکستان میں مکمل امن و استحکام کی واپسی تک ان کی قربانیاں رائیگاں نہیں جائیں گی، پاکستان کو غیر مستحکم کرنے کے دشمن کے ایجنڈے کے تحت کام کرنے والے دہشت گردوں، ان کے ساتھیوں اور ان کی حوصلہ افزائی کرنے والوں کو ریاست پاکستان کے سامنے ہتھیار ڈالنے تک ان کے خلاف کارروائی جاری رہے گی۔آئی ایس پی آر کے مطابق آرمی چیف جنرل سید عاصم منیر نے جنوبی وزیرستان میں آسمان منزہ کے قریب شیروانگی کے علاقے کا دورہ کیا جہاں گزشتہ روز پاک فوج کے چھ بہادر جوانوں نے دہشت گردوں کے خلاف بہادری سے لڑتے ہوئے جام شہادت نوش کیا۔ آرمی چیف نے علاقے میں تعینات افسران اور جوانوں سے بات چیت کی اور دہشت گردی کی لعنت سے لڑنے میں ان کے غیر متزلزل عزم کو سراہا۔آرمی چیف نے کہا کہ شہدا ہمارا فخر ہیں اور پاکستان میں مکمل امن و استحکام کی واپسی تک ان کی قربانیاں رائیگاں نہیں جائیں گی۔سپہ سالار نے واضح کیا کہ پاکستان کو غیر مستحکم کرنے کے دشمن کے ایجنڈے کے تحت کام کرنے والے دہشت گردوں، ان کے ساتھیوں اور ان کی حوصلہ افزائی کرنے والوں کو ریاست پاکستان کے سامنے ہتھیار ڈالنے تک ان کے خلاف کارروائی جاری رہے گی۔آئی ایس پی آر کے مطابق آرمی چیف کی آمد پر کور کمانڈر پشاور نے آرمی چیف کا استقبال کیا۔