کراچی، لیاری سے خفیہ اطلاع پر بھارتی جاسوس سمیت پاکستانی سہولت کار گرفتار

کراچی (نمائندہ خصوصی) پولیس اور قانون نافذ کرنیوالے ادارے نے خفیہ اطلاع پر بھارتی جاسوس سمیت پاکستانی سہولت کار کو گرفتار کرلیا۔تفصیلات کے مطابق ڈسٹرکٹ سٹی پولیس نے کلاکوٹ میں حساس ادارے کے ہمراہ مشترکہ کارروائی کرتے ہوئے پاکستان کے مختلف اہم اور حساس مقامات کی جاسوسی کرنے والے بھارتی جاسوس کو پاکستان سہولت کار سمیت گرفتار کرلیا۔ اس ضمن میںایس ایس پی سٹی عارف عزیزنے بتایاکہ گرفتار ملزمان کے قبضے سے 2 انڈین پاسپورٹ،1 پستول،پانچ لاکھ ایرانی کرنسی،جعلی جیولری بکس، 6 موبائل فونز، 1 ٹیبلٹ اور دیگر کاغذات برآمد ہوئے ہیں۔ایس ایس پی سٹی عارف عزیز کے مطابق گرفتار ملزمان میں اکھل دیو اور ظہور احمد شامل ہیں، اکھل دیو تربیت یافتہ انڈین جاسوس ہے جو پاکستان سہولت کار کی مدد سے جاسوسی کر رہا تھا۔عارف عزیز کے مطابق ملزم سے مزید تحقیقات کی جا رہی ہیں دوران تفتیش بڑے انکشافات بھی متوقع ہیں جبکہ ملزمان کے دیگر ساتھیوں کی گرفتاری کیلئے بھی چھاپے مارے جارہے ہیں۔