سندھ اسمبلی: رعنا انصار کو 24 گھنٹوں میں اپوزیشن لیڈر بنائے جانے کا امکان

کراچی (نمائندہ خصوصی) سندھ اسمبلی میں نئے اپوزیشن لیڈر کے لیے متحدہ قومی مومنٹ (ایم کیو ایم)پاکستان کی خاتون رکن اسمبلی رعنا انصار کیلئے میدان صاف ہوگیا ہے۔9 مئی کے واقعات کے بعد سے پاکستان تحریک انصاف (پی ٹی آئی)کے اپوزیشن لیڈر حلیم عادل شیخ اور پارٹی کے دیگر قانون سازوں کی عدم موجودگی کا فائدہ اٹھاتے ہوئے ایم کیو ایم نے اپنا اپوزیشن لیڈر لانے کی کوششیں تیز کردی تھیں اور اس سلسلے میں رعنا انصار کا نام فائنل کیا تھا۔ذرائع کے مطابق گرینڈ ڈیموکریٹل الائنس (جی ڈی اے)نے رعنا انصار کی حمایت پر دستخط کردیے ہیں۔ذرائع کا کہنا ہے کہ قائد حزب اختلاف کیلئے ایم کیو ایم کو مطلوب ممبران کی تعداد مکمل ہے۔ 24 گھنٹوں میں رعنا انصار کے قائد حزب اختلاف کا نوٹیفکیشن جاری ہونے کا امکان ہے، جس کے بعد وہ سندھ اسمبلی میں اپوزیشن کی پہلی خاتون لیڈر ہوں گی۔ اپوزیشن لیڈر کی مشاررت سے نگران وزیراعلی اور کابینہ کا اعلان ہوگا۔یاد رہے کہ تحریک انصاف کی موجودگی میں ایم کیو ایم پی کے سندھ اسمبلی میں 21 ارکان تھے، جب کہ پی ٹی آئی کے 30 ارکان اسمبلی تھے، جن میں سے کچھ پارٹی کے ابھی وفادار ہیں جب کہ دیگر نے منحرف ہو چکے ہیں۔ حالات کے پیش نظر پی ٹی آئی کے لیے اپوزیشن لیڈر کی سیٹ برقرار رکھنا مشکل ہو گیا ہے۔