کراچی(نمائندہ خصوصی) شہرقائد میں اتوارکی صبح مختلف علاقوں میں ہلکی بارش کے بعد گرمی کی شدت میں قدرے کمی آگئی۔تفصیلات کے مطابق اتوارکی علی الصباح کئی علاقوں میں ہلکی وتیز بارش ہوئی ہے۔ سائٹ ایریا، صدر، جمشید روڈ، نارتھ ناظم آباد، شاہراہ فیصل سمیت کئی علاقوں میں صبح کے وقت بارش سے موسم خوشگوار ہوگیا ہے تاہم بارش کے بعد کچھ علاقوں میں بجلی کی فراہمی معطل ہوگئی۔شہر قائد کے باسیوں نے اتوارکوسہانے موسم اور وقفے وقفے سے دن بھر ہونے والی رم جھم سے محظوظ ہوکرگزارا۔محکمہ موسمیات کے مطابق مسرور بیس پر 1 ملی میٹر سے کم بارش ریکارڈ کی گئی۔محکمہ موسمیات نے بتایاکہ اتوارکوجنوب مغرب کی سمت سے چلنے والی ہواﺅں کی رفتار 20 کلو میٹر فی گھنٹہ تھی۔محکمہ موسمیات کے مطابق کراچی میں اتوارکی صبح درجہ حرارت 29 ڈگری سینٹی گریڈ ریکارڈ کیا گیا، ہوا میں نمی کا تناسب 76 فیصد جبکہ ہوا 15 ناٹیکل میل کی رفتار سے چل رہی تھی۔
