اسلام آباد (نمائندہ خصوصی )بجلی کی قیمتوں میں اضافے کے بعدگیس کی قیمتوں میں بھی اضافے کا امکان ہے ۔ذرائع وزارت توانائی کے مطابق آئل اینڈ گیس ریگولیٹری اتھارٹی (اوگرا) کو بتا یاکہ گیس کی قیمتوں پر ورکنگ جاری ہے۔ذرائع وزارت توانائی کے مطابق گیس کی قیمتوں میں اضافہ ہر صورت ہوگا کیونکہ اس حوالے سے عالمی مالیاتی فنڈ (آئی ایم ایف) کو لکھ کر دیا ہوا ہے، جائزہ لیا جا رہا ہے کہ کس سلیب کے صارفین کےلئے گیس مہنگی کی جائے۔ذرائع کے مطابق ماہانہ 300 مکعب میٹر اور اس سے اوپر والے گھریلو صارفین کےلئے گیس پہلے ہی بہت مہنگی ہے، کوشش کی جا رہی ہے کہ آخری تین مہنگے ترین گیس سلیب کو نہ چھیڑیں۔ذرائع وزارت توانائی کے مطابق اس وقت ماہانہ 300مکعب میٹر تک گیس کے استعمال پر فی ایم ایم بی ٹی یوقیمت 1100روپے ہے، ماہانہ 400 مکعب میٹر استعمال تک فی ایم ایم بی ٹی یو قیمت 2000 روپے ہے، ماہانہ 400 مکعب میٹر سے زائد استعمال پر فی ایم ایم بی ٹی یو قیمت 3100 روپے ہے، باقی تمام سلیبز اور سیکٹرز کےلئے گیس کی قیمت کی ایڈجسٹمنٹ ہوگی، کوشش کی جارہی ہے کہ باقی گھریلو صارفین پر کم سے کم بوجھ پڑے۔ذرائع وزارت توانائی کے مطابق گیس کی قیمتوں میں اضافے کےلئے اقتصادی رابطہ کمیٹی (ای سی سی)کو تفصیلات آئندہ ہفتے پیش کیے جانےکا امکان ہے۔
